Öpüb, gözlərimin üstə qoymaqdan... – Yeni Şeirlər

Öpüb, gözlərimin üstə qoymaqdan... – Yeni Şeirlər
8 iyul 2019
# 18:41

Kulis.az Ruslan Dost Əlinin yeni şeirlərini təqdim edir.

ta bu bir otaqlı evi də satdım,

bilmirəm, vuracam hara şəklini.

saçların gözünün üstünə düşüb,

bəs niyə demirsən: dara şəklimi...

nə tanrıya açdım, nə sənə dedim:

mənimçün sevmək də bir sənət idi.

mənim ki ürəyim eşq sənədidi,

vurdum o sənədə ara şəklini.

düzəldim özümü gərək sabahdan,

endirim bu şəkil eşqimi taxtdan.

öpüb, gözlərimin üstə qoymaqdan

yara eləmişəm, yara, şəklini...

* * *

boşa sevmişəm yolları,

baxdım, yollar nişanlıdı...

elə can qoyub yazmışam,

sözlərim məndən canlıdı.

kənddən çıxdım, kəndimizin

ən pis adamını sevdim.

Ruslan Dost Əlidən başqa

sevdim eey, hamını sevdim.

güzgülərlə barışmadım,

düşmən saxladım evimdə...

nə vaxt susdum, dəmir pullar

qəfil səs saldı cibimdə.

baxdım, yollar nişanlıdı,

tez vuruldum ağaclara.

gördüm ki, heç nəyim yoxdu,

salam göndərdim aclara...

* * *

yaxını fərq eləmirik,

yaxşı görmürük uzağı.

hansı tərəfdə dursan da

elə bizik solun sağın...

hər əzan bir tərəfdədi,

yoxsa bütövsən elə sən?

görünmədiyin boydasan,

nətər varsansa, eləsən...

hər gün gördüyün adamlar

get-gedə yadlaşır sənə.

görünmə, bu görünməmək

möhtəşəm yaraşır sənə!

# 2708 dəfə oxunub

Oxşar xəbərlər

Həsən Kürün ölüm səbəbi barədə… - Nadir Yalçın

Həsən Kürün ölüm səbəbi barədə… - Nadir Yalçın

10:40 8 iyul 2025
Vaqif Poeziya Günləri keçiriləcək

Vaqif Poeziya Günləri keçiriləcək

10:40 8 iyul 2025
Gənc şair Həsən Kür dünyasını dəyişdi

Gənc şair Həsən Kür dünyasını dəyişdi

00:02 8 iyul 2025
Mədəniyyət Nazirliyinin Rusiya ilə əməkdaşlığına dair saxta sənəd  yayıldı

Mədəniyyət Nazirliyinin Rusiya ilə əməkdaşlığına dair saxta sənəd yayıldı

18:46 7 iyul 2025
Peruda 3500 illik  şəhər tapıldı

Peruda 3500 illik şəhər tapıldı

18:35 7 iyul 2025
Rəşad Məcid:  "Leyla xanımın sosial şəbəkədəki bu paylaşımını görəndə..."

Rəşad Məcid: "Leyla xanımın sosial şəbəkədəki bu paylaşımını görəndə..."

17:17 7 iyul 2025
#
#
# # #