Antalyada bir uşağın "anne-anne!" deyə qolundan yüngülcə çəkərək anasını dayandırıb nəsə arzuladığını gördüm. Gənc ana uşağa tərəf yüngülcə əyilib gülümsəyərək "efenim?" deyə onun nə istədiyini soruşdu. Ananın uşaqla belə kübar davranmağı məni heyran elədi.

***

Yaxud, ata-anasının yanında "Pole çudes" şou proqramına gələn uşaqlarla aparıcı Yakuboviçin necə davrandığına fikir vermisinizmi? Məsələn, uşaqdan belə soruşur:

- Adınız nədi? (Siz deyə müraciət eləyir. M.K.)

- Maşa.

- Bəs atanızın adı?

- Aleksandr.

- Demək, Maşa Aleksandrovna!..

Şoumenin belə xırda dialoqu, sözsüz ki, bütün Rusiya insanına sirayət eləməyə hesablanıb.

***

Məsələn, mənim kiçik qardaşımın həyat yoldaşı rusdu, iki qız övladları var. Dördüncü sinfi Rusiyada bitirdikdən sonra qızlarını gətirib kəndimizdəki orta məktəbə qoydular, kənddə anamla yaşayırlar. Hazırda 8-9-cu siniflərdə oxuyurlar. Hər ikisi mənə "siz"lə müraciət edir.

***

Ancaq bizdə!

Bir də görürsən, cavan oğlan inboksuna yazıb! Bəh-bəh-bəh! "Sən"in biri bir qəpik! Elə bil əsgərlikdə mənimlə yan-yana yatıb.

Özündən yaşca böyüyə "sən" deyib girişənlərimiz artıq kütləvidi. Onlar, tanımadığı adama "siz" deməyi öz rəncbər şəxsiyyətinə sığışdırmır, yəqin...

• Məşhur festivalda "Bayatı-Şiraz" səsləndirildi
• Mədəniyyət Nazirliyi müsabiqə və müsahibələr keçirəcək
• İsmayıl Hacıbəyovun yaradıcılığına həsr olunmuş portret-konsert keçiriləcək