Azərbaycan Dövlət YUĞ Teatrında yeni teatr mövsümünün ilk iclası baş tutub.

Kulis.az xəbər verir ki, teatrın kollektivinin iştirak etdiyi görüşdə direktor Əməkdar mədəniyyət işçisi İslam Həsənov və baş rejissor Mikayıl Mikayılov yeni mövsümdə nəzərdə tutulan teatrın fəaliyyəti barədə planlardan söz açıb.

M.Mikayılov çıxışında teatrın yeni hazırlanacaq tamaşaları barədə məlumat verib.

Yeni teatr mövsümü çərçivəsində YUĞ Teatrında "Kitabi-Dədə Qorqud" dastanı əsasında rejissor Mikayıl Mikayılovun quruluşunda "Mən - Dədə Qorqud" tamaşasının premyerası baş tutacaq. Bununla birgə YUĞ Teatrının yaradıcısı Əməkdar incəsənət xadimi Vaqif İbrahimoğlunun A.P.Çexovun "Albalı bağı" əsəri əsasında hazırladığı "Birinci akt" tamaşasının yeni mövsümdə bərpa olunaraq nümayiş olunması planlaşdırılır.

Teatrın direktoru Əməkdar mədəniyyət işçisi İslam Həsənov teatrın xarici qastrol səfərlərində və beynəlxalq teatr festivallarında iştirak edəcəyini qeyd edib. Önümüzdəki aylar çərçivəsində YUĞ teatrının Qazaxıstanda, Meksikada qastrol səfərlərində olacağı gözlənilir.

Qeyd edək ki, YUĞ Teatrı yeni mövsümü 27 sentyabrda Xalq yazıçısı Anarın hekayəsinin motivləri əsasında rejissor Əbdülqəni Əliyevin quruluşunda hazırlanmış "Asılqan" tamaşası ilə açacaq. Səhnə əsərində aktyorlar Elşən Əsgərov və Ləman Mərrih iştirak edir. Tamaşanın quruluşçu rəssamı Əfşan Əsədova rejissor assistenti isə Məryəm Qələndərovadır.

• “Çoxsaylı oyuncaqlarından biri deyiləm!..” - Patriarxat nə vaxt qadınlara “öz yerini” göstərməyə başladı?
• "Harri Potter"in rəssamı vəfat etdi
• Obrazlarının fikirləri "həbs qoxuyan" yazıçı - 20 Yanvar faciəsində Yusif Səmədoğlu hansı addımı atmışdı?