Rusiyanın Novosibirsk Prokurorluğu rejissor Timofey Kulyabin barədə şəhər rəhbəri Tixonun müraciəti əsasında inzibati qayda pozuntusu ittihamı ilə iş açıb.

Kulyabin bir müddət bundan əvvəl yerli teatrda Rixard Vaqnerin “Tanqeyzer” operasının müasir versiyada tamaşaya qoyub.

Romantik “Tanqeyzer” operasının premyerası 2014-cü ilin dekabrında baş tutub. Rejissor tamaşadakı hadisələri müasir dövrə gətirib. Əsas qəhrəman “Veneranın mağarası” adlı filmi yenicə bitirmiş kinorejissor Henrik Tanqeyzerdir. Hadisələrin inkişafından tamaşaçı anlayır ki, film guya İsa Məsihin Veneranın mağarasında yaşadığı və cismani həzlər keçirdiyi vaxtlarından, həyatının ilk illərindən bəhs edir.

Colta.ru saytındakı resenziyada yazılana görə, tamaşada “Tanqeyzer” filminin plakat afişası da gözə dəyib. Bu plakatda Məsihin çarmıxdakı kanonik fiquru qadın ayaqlarının arasında yerləşdirilib. Bundan başqa tamaşada filmin bu yerlərinin “çəkilişi” də yer alıb.

Kulyabini “dini simvollara düşünülmüş şəkildə hörmətsizlik etdiyinə görə” 3 mindən 5 min rubla qədər cərimə və ya 120 saat icbari iş gözləyə bilər.

“Tanqeyzer” Rixard Vaqnerin 5-ci operasıdır. İlk dəfə 1845-ci ildə Drezdendə ifa olunub. Sonra müəllif tərəfindən bir neçə dəfə dəyişdirilib. Operanın qəhrəmanı mifik Veneranın mağarasında kef içində həyat keçirən, sonra reallığa qayıdan cəngavərdir.

• Leonardo Di Kaprio da "Kalmar oyunu"nda çəkiləcək?
• “Xalq artistinin atası Mirzəxəlil kim idi?“ adlı hekayələr kitabının təqdimatı keçirilib
• Xalq yazıçısının yeni kitabı işıq üzü görüb