Xəbər verdiyimiz kimi, bu ilin iyun ayında Avrasiya Yazarlar və Azərbaycan Yazıçılar birliklərinin təşkilatçılığı ilə III Beynəlxalq Mahmud Kaşğarlı Hekayə Müsabiqəsinə start verilib.

Artıq müsabiqənin Azərbaycan üzrə qalibləri müəyyənləşib. Qaydalara görə, ölkələrdə hekayələrin qəbulu sentyabrın 30-dək aparılıb. Azərbaycanda müsabiqəyə 22 müəllif 31 hekayə ilə qatılıb. Hekayələr 6 nəfərdən ibarət münsiflər heyətinə təqdim olunub. Azərbaycan Yazıçılar Birliyinin, Türkiyə Cümhuriyyəti Səfirliyinin Mədəniyyət Müşavirliyinin və Mahmud Kaşğarlı Hekayə Müsabiqəsinin əvvəlki qaliblərindən ibarət münsiflər heyəti oktyabr ayı ərzində hekayələri oxuyaraq 10 ballıq sistemlə qiymətləndirib.

Münsiflərin qiymətləndirməsinə əsasən, «Yelkənli qayıq» şərti imzası ilə təqdim edilən (müəllif Alpay Azər (Əhmədov) «Hikkəli qadın» hekayəsi 45 balla 1-ci yerə layiq görülüb. «İnal» şərti imzası ilə təqdim edilən (müəllif Natiq Məmmədli) «Bekketə salam» hekayəsi 43 balla 2-ci yerin sahibi olub. “Lalə.M” şərti imzası ilə müsabiqəyə təqdim olunmuş (müəllif Vəfa Mürsəlqızı) «Namus» hekayəsi isə 42 balla 3-cü yeri tutub.

Bildirildiyi kimi, 25-ə yaxın ölkədə birinci yer tutan hekayələr Türkiyə türkcəsinə çevrilərək ayrı-ayrı türkdilli ölkə yazarlarından təşkil edilmiş münsiflər heyətinə təqdim olunacaq. Ölkələrarası mükafatların təqdimatının bu il dekabr ayının 8-də Bakıda keçirilməsi nəzərdə tutulur. Azərbaycan üzrə müsabiqənin qaliblərinə mükafatlar da həmin mərasimdə təqdim olunacaq.

S.ABDULLAYEVA

• "Bəlkə də köklüyümə gülürlər?" - Miriam Presslerin "Tünd şokolad" əsərindən bir hissə
• Bu sendviçdə mayonez yoxdur - Cerom Devid Selincerin hekayəsi
• Dünyanın ən qanlı tablosunun arxasında gizlənən qadın faciəsi