III Bakı Beynəlxalq Teatr Konfransının 5-6 noyabr tarixində keçiriləcəyi bəlli oldu. Bu barədə kulis.az Nazirliyin rəsmi saytına istinadən xəbər verir.

Mədəniyyət və Turizm Nazirliyi, Azərbaycan Milli Elmlər Akademiyası və Azərbaycan Teatr Xadimləri İttifaqının təşkilatçılığı ilə "Azərbaycan teatrı 2009-2019-cu illərdə" Dövlət Proqramına uyğun olaraq təşkil edilən konfrans «Teatr sənətinin multikulturalizm – universal dəyərlər sistemində yeri» mövzusuna həsr olunub.

Dövlət Musiqili Teatrında gerçəkləşəcək budəfəki konfrans həm qonaqların sayı, həm də müzakirə olunacaq mövzuların əhatə dairəsinə görə fərqlənəcək: 47-dək ölkədən 125 nəfərə yaxın dünyanın məşhur teatr, incəsənət xadimləri – rejissorlar, aktyorlar, keçmiş mədəniyyət nazirləri, dramaturqlar, ssenaristlər, bir neçə ölkənin teatr xadimləri ittifaqlarının, beynəlxalq teatr festivallarının rəhbər şəxsləri, teatrla bağlı tanınmış qurumların, eləcə də müxtəlif ölkələrin teatrlarının rəhbərləri bu tədbirdə iştirak üçün təşkilat komitəsinə müraciət ediblər.

Beynəlxalq konfransla yanaşı, noyabrın 4-də və 7-də treninqlərin də təşkil olunacağı nəzərdə tutulub. Tədbirdə ASSİTEJ (Uşaq və Gənclər Teatrları Beynəlxalq Assosiasiyası), UNİMA (Beynəlxalq Kukla Teatrları Assosiasiyası), İTİ (Beynəlxalq Teatr İnstitutu), OİSTAT (Teatr Rəssamları, Texniki İşçilər və Memarların Beynəlxalq Təşkilatı), İFTR (Beynəlxalq Teatr Tədqiqatları Federasiyası) kimi nüfuzlu təşkilatların baş katibləri və prezidentlərinin, eləcə də plenar iclaslarda müəyyən edilən mövzular üzrə nüfuzlu mütəxəssislərin məruzələrlə çıxış edəcəyi gözlənilir.

III Bakı Beynəlxalq Teatr Konfransına ABŞ, Böyük Britaniya, Kanada, Fransa, İtaliya, CAR, Hollandiya, Avstraliya, İrlandiya, Rusiya, BƏƏ, İspaniya, Mərakeş, Kuba, Ukrayna, Polşa, Türkiyə, Estoniya, Gürcüstan, Bolqarıstan, Almaniya, Yunanıstan, İsrail, Küveyt, Makedoniya, Oman, Suriya, Finlandiya, Bəhreyn, Avstriya, Hindistan, İraq, İran, Litva, Qazaxıstan, Səudiyyə Ərəbistanı, Rumıniya, Kolumbiya və s. ölkələrdən nümayəndələr qatılacaq. Dünya teatr sənətinin müasir problemləri elmi müstəvidə təhlil olunacaq, mütəxəssislər fikirlərini bölüşəcəklər.

Tədbir çərçivəsində "Müasir teatrşünaslıq" (akademik Nelli Korniyenko, Ukrayna), "Rejissor və aktyor sənəti" (Paddi Kannin, Böyük Britaniya), "Səhnəqrafiya" (İosif Yuçupov, ABŞ və Luis Yansen, Hollandiya) mövzularında treninqlər keçiriləcək, fikir mübadiləsi aparılacaq.

• Günahsız yerə edam edilən ana - Polis onun pulunu niyə oğurlamışdı?
• Heydər Əliyev Sarayında “Oyanış” adlı konsert proqramı keçiriləcək
• Britaniya Film Akademiyası bu şəxsləri mükafatdan məhrum edəcək