Bakı Slavyan Universitetində dahi ingilis şairi və dramaturqu Ulyam Şekspirin vəfatının 400 illiyinə həsr olunmuş tədbir keçirilib.

BSU-nun Mətbuat xidmətindən Kulis.Aza verilən xəbərə görə, tədbirin açılışında BSU-nun rektoru, professor Asif Hacıyev Ulyam Şekspirin dünya ədəbiyyatında tutduğu mövqedən danışıb.

Şekspirin əsərlərinin 400 ildir ki dünya teatr səhnələrindən düşmədiyini bildirən professor Asif Hacıyev dahi dramaturqun məşhur əsərlərinin tələbələr tərəfindən səhnələşdirilməsini yüksək qiymətləndirib.

Bədii gecənin təşkilatçılarından olan BSU-nun İngilis filologiyası kafedrasının dosenti Elxan Mirzəyev və “Yuğ” teatrının baş rejissoru Gümrah Ömər öz təəssüratlarını iştirakçılarla bölüşüblər. “Yuğ” teatrı ilə BSU-nun uzun müddət davam edən əməkdaşlığından danışan Gümrah Ömər tələbələrin teatra olan marağını yüksək qiymətləndirib. Bildirilib ki, ali təhsil ocağında milli-mədəni dəyərlərin qorunub saxlanılması elmə verilən vacib töhvədir. Teatr səhnəsində daim yaradıcı gənclərə ehtiyac olduğunu deyən Gümrah Ömər bu istiqamətdə BSU gənclərinə hər zaman dəstək olacağanı vurğulayıb.

Sonra Şekspirin “Kral Lir”, “Romeo və Cülyetta”, “Hamlet”, “Otello” əsərlərindən parçalar BSU tələbələri tərəfindən ingilis dilində səhnələşdirilib. Quruluşçu rejissoru Gümrah Ömər olan səhnələri tələbələr böyük həvəslə təqdim ediblər.

• Bəstəkarlar İttifaqında “20 Yanvar” adlı sənədli film nümayiş olunub
• Ofeliya Sənani xəstəxanadan evə buraxıldı
• Nəriman Həsənzadə xəstəxanaya yerləşdirilib