Bu gün görkəmli türkiyəli şair, yazıçı Ahmet Haşimin anım günüdür.

Kulis.az onun "Bizə görə" kitabından sitatları təqdim edir.

Səyahət, xüsusən də dəniz səyahəti, ruhun bütün dərdlərinin dərmanıdır.

***

Sağlamlığın həddindən artıq baha olduğu bir əsrdə, ucuz bir sevinci niyə özümüzə çox görməliyik?

***

Təəssüf ki, bədənin zəifləməsi ağlın yetkinləşdiyi dövrə təsadüf edir.

***

Zəka – nar, heyva və portağal kimi – gec rəng və qoxu qazanan bir payız məhsuludur. Ən azı qırx il günəşdə bişmədən bu əsilzadə meyvə ballanmır...

***

Gecə böyük və qara bir yarpaqdır.

***

Əsnəmək, əzablı bir ruh düyünü olan bütün gərgin vəziyyətlərin çözülüb açılmasıdır.

***

Bütün canlı məxluqlarla müqayisədə insanı üstün edən, qabiliyyətlərin rəngarəngliyidir.

Sevincimizə hakim deyildik, kədəri özümüzdən uzaqlaşdıracaq heç bir qüvvəmiz yox idi.

***

Açıq desək, çarxları su ilə dönən bu dünya, hələ də köhnə dəyirmanından fərqlənmir!

***

Dünya mətbuatına göz gəzdirəndə belə qənaətə gəlmək olur ki, mədə və bağırsaq, beyindən daha şərəfli üzv mərtəbəsinə yüksəlib...

***

Ruha gedən yolları havada cızan yalnız qoxulardır.

***

Təəssüf ki, iflic olan təkcə ədəbiyyatımız deyil. Bu bitkinlik rəngi, gizli bir xəstəliyin sarılığı kimi, ruhun və xəyalın bütün bağçalarına yayılmaqda və bütün yarpaqları yer-yer soldurub qurutmaqdadır.

***

Ay! Ay! Yalançı ay! Zəkadan yorulanlarıdincəldən xəyal kimi, günəşdən bezənlərə də təsəlli verən sənsən!"

***

Eyni şeyləri eyni şəkildə söyləmək üçün bu qədər nəsillərin bir-birinin ardınca gəlməsinə nə ehtiyac var idi?

***

Səhrada yolunu azanlar kimi, biz indi zamanın içində itkin düşmüş insanlarıq.

***

Böyük fikir yaradıcıları, tamamilə başa düşülmək üçün nə təşbehi, nə istiarəni , nə də şeirin digər bədii hüsnlərini xor görməyiblər.

***

Hərçənd həyat kitaba sığmayacaq qədər genişdir, lakin təkrarlarla doludur.

Heyvan öz məqsədinə çatıb dayanıb; insan isə hələ də öz məqsədini axtarmaqla məşğuldur.

***

Bir eşq dəqiqəsinin ləzzətinə əbədilik bəxş edəcək qüdrətə malik olmayanlar, bəzək-düzəkdən mədəd ummaqda bəlkə də çox haqlıdırlar. Lakin ipəklər və boyalar ruhun çatışmazlıqlarının yerini necə doldura bilər ki?

***

Dənizin yaşıl bir qaranlıq hökm sürən dibində bitən rəngli süngərlər və qıpqırmızı mərcanlar kimi, ruhun alt qatlarında da gözlə görünməyən bir məntiqin qəribə bitkiləri qol-budaq atır...

• Süni təbəssümlər, saxta rəqslər və böyük üsyan - Qadağalar altında kimlər qalib gəlir?
• Cənubi Koreyanın “Oskar” namizədi açıqlandı
• Everest haqqındakı filmin treyleri yayımlandı