Azərbaycan Kinematoqrafçılar İttifaqında “Ölməzdən öncə izləməli olduğunuz 111 film” kitabının təqdimatı keçirilib.

Layihənin rəhbəri Şahin Xəlil kitabı “Kinomansan?” Fb səhifəsindən olan yoldaşları - Fərhan Hüseynli, Fəridə Paşa, Nərminə Haqverdiyeva, Rövşən Abbas və başqaları ilə birlikdə hazırlayıblar.

Tədbiri giriş sözü ilə açan Kinematoqrafçılar İttifaqının katibi Əli İsa Cabarov kitabı Azərbaycan kinosunda inqilabi hadisə adlandırıb: “Kino təkcə yaxşı filmlər demək deyil, həm də festivallar, kino nəşrləri, xüsusi ilə tamaşaçının zövqünü formalaşdıran bu cür nəşrlərdir. Xüsusi ilə layihənin gənclərin öz təşəbbüsü ilə heç kimdən kömək gözləmədən nəşr etməsi xüsusi qeyd olunmalıdır”.

Kitaba ön söz yazan dramaturq və kinorejissor Rüstəm İbrahimbəyov da tədbirdə çıxış edib: “Şadam ki, Bakıda bir qrup gənc dünya kinematoqrafiyasının ən yaxşı filmlərindən ibarət "111 film" adlı bir kitab ərsəyə gətirmək qərarına gəldilər. Filmlərin seçimi, onlar haqda məlumat, onların ifadə edilməsi üsulu kitabın tərtibatçılarının zövqündən söz açır ki, fikrimcə bu da kitabı gənclər üçün daha da maraqlı edir. Belə bir kitabın Azərbaycanda ərsəyə gəlməsi şübhəsiz təqdirə layiq haldır”.

Kinoşünas Ayaz Salayev müəlliflərin film seçimini uğurlu sayıb: “Bu filmlər bizim dünyaya baxışımızı, həyat, haqqında təsəvvürlərimizi zənginləşdirir, tarixə və hadisələrin gedişatına tam yeni gözlə baxmağa imkan yaradır və bu onu sübut edir ki, bu toplunu yaradanlar həyat və mədəniyyət haqqında çox ciddi və dərin düşünməyə çalışır. Mən həmişə bizi əvəzedən nəslin bizdən daha da üstün olacağına inanmışam və bu toplu buna parlaq numünədir. Şəxsən mən bu topluya müqəddimə yazmağı özümə şərəf bilirəm və təşəbbüskarlara minnətdarlığımı bildirirəm”.

Tədbirin sonunda layihə rəhbəri Şahin Xəlil iştirakçılarla sevincini bölüşüb: ”Hesab edirəm ki, istəyimizə nail olmuşuq. Bu kitab hər bir kino sevərə hədiyyədir. Azərbaycanda kino sənətinə aid bu cür ensiklopedik-informatik kitab ilk dəfədir ki, nəşr olunur. Mənim üçün bu kitabın layihə rəhbəri olmaq böyük şərəfdir. İnanıram ki, "111 film" kitabı rəfinizdə ən sevimli kitablar sırasında duracaq. Kitabda olan dolğun məlumatlarla isə film zövqünüz bir az da təkmilləşib, kino sənətinə olan sevginiz daha da artacaq”.

Layihə rəhbəri növbəti layihənin “Hər ölkənin ən yaxşı filmi” olacaq anonsu verməyi də unutmadı.

“111 film”in kitab dükanlarında satışı nəzərdə tutulub.

• Həmid Herisçi elə bilir ki, AYB-yə üzv olursansa...
• Təhlükəli ipucları - Faruk Ulayın hekayəsi
• Firəngiz Mütəllimova Polad Bülbüloğlu ilə fotolarını yayımladı