Kulis.az Rauf Ranın yeni şeirlərini təqdim edir.

Küçədəki bomjun
zibil qutusunda
çörək axtarması kimi
axtarıram uşaqlığımı
ömür dediyinizdə...

***

• Elgün üçün susma! - Günün şeiri
• Bakıda “Nesvij – dünya mədəni irsi” sərgisi açılacaq
• "VİA Qra" fəaliyyətini dayandırdı

Yer üzündən qalxan kosmik gəmi
güllə kimi açılır
ucsuz-bucaqsız uzaqlara...
Tarix yazır:
güllələr çıxdılar yaşam axtarışına,
gülümsəyərək...

***

Qürub,
tək ayaqla addımlayır əlil uşaq,
Fırladır əsasıyla
yorulmuş Yer kürəsini.

***

Bir gün
dar ağacındakı ip də
asdı özünü dar ağacından,
amma bacarmadı çəkməyi,
ayağının altından insanları...

***

Bir gün tanrı götürüb topunu
oynamıram deyib gedəcək evinə.
Və sənin duaların heç kimə çatmayacaq.

***

Avreliyə...

Əzab nədir, Avreli,
Sevgilərin sonrası
bir gedişin ağrısı?
ya kasıb bir daxmada
bir gecənin yarısı
südsüz qalan körpənin
süd dişinin ağrısı?

***

İndi səni unutmaq
yol kənarında əl açan
dilənçi yanından:
- yalançıdır, deyib
keçmək kimi...
Keçirsən,
və qəfil dayanırsan:
- birdən əgər deyilsə...

• Elgün üçün susma! - Günün şeiri
• Bakıda “Nesvij – dünya mədəni irsi” sərgisi açılacaq
• "VİA Qra" fəaliyyətini dayandırdı