Rusiyanın “Birinci kanal”ı yeni mövsümdə görkəmli Azərbaycan müğənnisi və bəstəkarı Müslüm Maqomayevin həyatına həsr olunmuş filmi təqdim edəcək.

“Bakı bülbülü” adlanan, 8 seriyadan ibarət filmin ideya müəllifləri Aras və Emin Ağalarovlardur.

Emin Ağalarovun etiraf etdiyinə görə, o, atası ilə birlikdə layihənin maliyyələşdirilməsində iştirak etməklə onlar bu işin hər bir mərhələsini – yayımçı kanalın seçilməsindən və ssenarinin yazılmasından tutmuş, baş rol ifaçılarının kastinqi və prodüserliyədək məsələləri diqqətdə saxlayıb.

Filmin baş məsləhətçisi müğənninin həyat yoldaşı Tamara Sinyavskayadır. Sinyavskayanın obrazını 28 yaşlı aktrisa və model İrina Antonenko “canlandırır”. Maqomayevin obrazını isə serb aktyoru Miloş Bikoviç yaradıb.

Janr etibarilə film daha çox melodramaya yaxındır. Bikoviç qeyd edir ki, onlar “Maqomayevin anadan olmasından vəfatına qədər həyatı haqqında deyil, onun ömrünün müəyyən dövrü – təqribən 30 yaşında olduğu və Tamara Sinyavskaya ilə tanışlığı” barədə film çəkiblər. Brejnevin durğunluq illərində yaranan və alovlanan bu məhəbbət tarixçəsi də ekran əsərinin mərkəzi süjeti olacaq. /azertag.az/

• Uşaq İncəsənət Festivalının birinci seçim turu davam edir
• Əbəs yerə göz vurmurdu çadra altdan o qız mənə - Yeseninin "İran nəğmələri"
• Məzardan çıxan, dünyaya qayıdan, yaşamağa başlayan kimdir? - "Gözmuncuğu"nun sirri