Bakı Şəhər Mədəniyyət Baş İdarəsinin təşkilatçılığı və Beynəlxalq Muğam Mərkəzinin dəstəyi ilə iyunun 1-dən keçirilən “Caspian etude” Gənc Pianoçuların I Beynəlxalq Müsabiqəsi başa çatıb.
Müsabiqənin sonuncu günü, iyunun 4-də Beynəlxalq Muğam Mərkəzində müsabiqənin rəsmi bağlanışı, qaliblərin mükafatlandırma mərasimi və laureatların qala konserti reallaşıb.
Mükafatlandırma mərasimində Bakı Şəhər Mədəniyyət Baş İdarəsinin rəisi Cəlil Məlikov müsabiqənin uğurla yekunlaşdığını diqqətə çatdırıb. Təşkilat Komitəsinə, pedaqoqlara təşəkkür edərək gənc iştirakçılara gələcək fəaliyyətlərində uğurlar arzulayıb. Münsiflər heyətinin sədri, Xalq artisti Murad Hüseynov müsabiqənin yüksək səviyyədə keçdiyini söyləyib. Bildirib ki, ölkəmizdə çoxsaylı beynəlxalq festival və müsabiqələr sırasına daha bir uğurlu layihənin qoşulması əlamətdar hadisədir. Həyata keçirilən layihələr gənc nəslin hərtərəfli inkişafına stimul verir. Sevindirici haldır ki, yaradıcı gənclərimiz bu müsabiqələrdə öz bacarıqlarını nümayiş etdirir və özlərini təsdiq edə bilirlər.
Daha sonra hər yaş kateqoriyası üzrə I, II, III yer, laureat və xüsusi diplom olmaqla qaliblər mükafatlandırılıblar.
Tədbir müsabiqə qaliblərinin qala konserti ilə davam edib.
Qeyd edək ki, 16 yaşına qədər iştirakçılar arasında dörd yaş kateqoriyasında (9-10; 11-12; 13-14; 14-16 yaş) keçirilən müsabiqədə musiqi və incəsənət məktəblərinin, ixtisaslaşmış musiqi təhsili müəssisələri və musiqi kolleclərinin tələbələri iştirak ediblər. Musiqi yarışmasında ölkəmizlə yanaşı İsrail, Çin, Rusiya, Avstriya və Ukraynadan ümumilikdə 90 iştirakçı istedadını nümayiş etdirib. Müsabiqədə gənc istedadları Xalq artisti, pianoçu Murad Hüseynovun sədrliyi ilə Joakin Rodriqo adına Valensiya Musiqi Konservatoriyasının professoru Marina Bleyns (İspaniya), Sveşnikov adına Dövlət Akademik Rus Xorunun konsertmeysteri Nikita Volov (Rusiya), tanınmış pianoçu Marko Freydən (Almaniya) ibarət beynəlxalq münsiflər heyəti qiymətləndirib./azertag.az/
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
