Azərbaycanın ən məşhur xalçalarından biri - “Ərdəbil” və “Şeyx Səfi xalçası” adları ilə tanınmış xalça hazırda Los-Anceles dairəsindəki İncəsənət Muzeyində nümayiş etdirilir.

Kulis.azın Azərtaca istinadən verdiyi xəbərə görə toxunma tarixi məlum olan ən qədim, ən iri (35 milyon ilmədən ibarət) və tarixi əhəmiyyətli xalçalardan biri sayılan “Şeyx Səfi xalçası” başqa bir məşhur Azərbaycan xalçası ilə bərabər uzun müddət Londondakı Viktoriya və Albert Muzeyində saxlanılıb.

Azərbaycanın Los-Ancelesdəki baş konsulluğundan verilən məlumata görə, bu iki xalça 1539-1540-cı illərdə Təbrizdə toxunub və XIX əsrə qədər Ərdəbil şəhərindəki bir məbəddə saxlanılıb. XIX əsrdə həmin xalçalar Londona gətirilib. Onlardan biri (“Şeyx Səfi xalçası”) gizli şəkildə amerikalı sənayeçi C.Poul Gettiyə satılıb. 1953-cü ildə Getti həmin xalçanı Los-Anceles dairəsindəki İncəsənət Muzeyinə hədiyyə edib.

Hazırda həmin muzeydə nümayiş etdirilən xalça daha gözəl hesab edilir. Xalçanın ölçüləri çox böyük (uzunluğu 23, eni 13 fut) olduğuna görə, adətən onu 6-10 ildə bir dəfə Los-Anceles dairəsindəki İncəsənət Muzeyində nümayiş etdirirlər. 1965-ci ildəki “debüt”ündən ötən müddətdə bu xalça cəmi 6 dəfə nümayiş etdirilib. Builki sərgi fevralın 11-dək davam edəcək.

• Diplomlu taksi sürücüsü və armatur söhbəti - Babək Məmmədlinin hekayəsi haqqında
• Vaqif əvəzedilməz idi... - Kamal Abdulla
• "Məhbuslar dənizdə batırılırdı, o vaxt Bakıda balıq ətindən kütləvi zəhərlənmə olmuşdu" - Ruhulla Axundovu niyə öldürmək istəyirdilər?