15 avqust Xalq artisti Afaq Bəşirqızının doğum günüdür.

Kulis.az bu münasibətlə aktrisanın həyatı, fəaliyyəti ilə bağlı maraqlı faktları və onun Söylü rolunu ifa etdiyi məşhur "Bəxt üzüyü" filmindən fraqmenti təqdim edir.

Afaq Bəşirqızı (Afaq Bəşir qızı Səfərova) — 15 avqust 1955-ci ildə Bakı şəhərində, görkəmli aktyor Bəşir Səfəroğlunun ailəsində dünyaya göz açıb.

Azərbaycan teatr və kino sənətinin sevilən simalarından olan Afaq xanım, özünəməxsus sənət üslubu və güclü xarakter rolları ilə tamaşaçıların qəlbində dərin iz buraxıb.

Aktrisalığa 1973-cü ildə Lənkəran Dövlət Dram Teatrında başlayan sənətkar, 1975–1989-cu illərdə Sumqayıt Dövlət Dram Teatrında fəaliyyət göstərib.

1989-cu ildən etibarən isə Azərbaycan Dövlət Musiqili Teatrının aparıcı aktrisasıdır.

Klassik və müasir dramaturgiyaya əsaslanan rolları ilə səhnədə yadda qalan çıxışlar edən Afaq Bəşirqızı, həm də kino və televiziya sahəsində məhsuldar fəaliyyət göstərib.

Xüsusilə, "Bəxt üzüyü" filmində canlandırdığı Söylü obrazı bu gün də tamaşaçıların sevə-sevə xatırladığı rollardandır.

O, "Afaq gülür, güldürür" televiziya şousu ilə geniş auditoriyaya yumorun və incə satiranın gücünü göstərib.

Eyni zamanda pedaqoq kimi uzun illər Mədəniyyət və İncəsənət Universitetində çalışıb, professor elmi adına layiq görülüb.

Qeyd edək ki, bir çox fəxri adlara və nüfuzlu mükafatlara layiq görülən Xalq artisti Azərbaycan Prezidentinin sərəncamı ilə ötən gün

"Şərəf" ordeni ilə təltif edilib.

• Əfsanəvi Şafrazi illər sonra sənətə qayıtdı
• Azərbaycan radiosunun binası sökülür
• Çexiyada qadın gəzinti zamanı xəzinə tapdı