2 sentyabr Xalq artisti Həsənağa Salayevin anım günüdür.

Kulis.az bu münasibətlə onun həyat və yaradıcılığı ilə bağlı maraqlı faktları təqdim edir.

Həsənağa Salayev 5 dekabr 1921-ci ildə Bakı şəhərində dünyaya gəlib.

6-cı Şura məktəbində ilk təhsilini alıb, 1937-ci ildə burdakı 9 illik təhsilini başa vurub.

1938-ci ildə Akademik Milli Dram Teatrının aktyor heyətinə qəbul edilib. 1941-ci ildə təhsilini başa vurduğu günlərdə müharibəyə gedib.

Sovet-fin müharibəsində 20 gün əsir qalan Həsənağa Salayevə 8 ay işgəncə verib, suyun içində saxlayıblar ki, “xalq düşməni" olduğunu boynuna alsın. Lakin o, heç nəyi boynuna götürməyib və sonra sərbəst buraxılıb.

1946-ci ildə müharibə bitdikdən sonra teatra qayıdıb.

Qısa müddətdə Həsənağa Salayev teatrın repertuarında yer tutan yeni tamaşalarda maraqlı rollar oynayıb. Müxtəlif illərdə Səməd Vurğunun "Xanlar", Zeynal Xəlilin "Qatır Məmməd", Vilyam Şekspirin "Otello", Şekspirin"Antoni və Kleopatra", Mehdi Hüseynin "Cavanşir", Lope de Veqanın "Sevilya ulduzu", Süleyman Rüstəmin "Qaçaq Nəbi", Mirzə Fətəli Axundzadənin "Hacı Qara", Bernard Şounun "Şeytanın şagirdi", Bəxtiyar Vahabzadənin "İkinci səs", Nazim Hikmətin "Şöhrət və ya unudulan adam" (Doktor), Fridrix Şillerin "Orlean qızı", Hüseyn Cavidin "Səyavuş" əsərlərinin tamaşalarında xarakterik səhnə surətləri yaradıb.

O, "Görüş", "O olmasın, bu olsun", "İstintaq davam edir" və bir çox başqa filmlərdə yaddaqalan rollar ifa edib.

Həsənağa Salayev bacısı və onun həyat yoldaşı ilə münaqişədən sonra ata evini tərk edib. Dostu, Xalq artisti Adil İsgəndərov ona yaşamaq üçün teatrın binasında bir otaq ayırıb.

Həsənağa Salayev ailə qurduqdan sonra Adil İskəndərovdan əlavə bir otaq da istəyib və Adil müəllim evsiz aktyora əlavə 1 otaq da ayırıb. Həsənağa Salayev uzun illər ailəsi ilə teatrın binasında yaşayıb.

Həyat yoldaşı Sərvət xanımla 1959-cu ildə tanış olub və onlar arasında sevgi yaranıb. Cütlük 2 il sonra evlənib. O, həyat yoldaşını heç vaxt adıyla çağırmaz, həmişə ona “Xanım” deyə müraciət edərmiş.

Evlənəndə Həsənağanın 40 yaşı var imiş, xanımından 17 yaş böyük imiş. Cütlüyün iki oğlu olub – Dəryanur və Rəşadnuri. Övladları dünyaya gələndə Həsənağa Salayev sevindiyindən doğum evinin pəncərəsinə güllər atıb... Cütlük 20 il bir yerdə yaşayıb.

Aktyorun oğlu Dəryanura nişanlısı xəyanət edib. Sarsılan gənc cəbhəyə - Qarabağ döyüşlərinə gedib və şəhid olub. Digər oğlu Rəşadnuri isə narkotikin qurbanı olub. Beləliklə, onun ailəsindən heç kim qalmayıb.

Həsənağa Salayev 2 oktyabr 1981-ci ildə dünyasını dəyişib.

• Avropanın ən hündür bazilikasının tikintisi tamamlanacaq
• Üzeyir Hacıbəylinin evində yaşayan Xalq artisti - Əsərləri niyə qadağan olunmuşdu?
• “Həyat yoldaşı vəfat edən qadın 40 gün evdən çıxmazdı...” – ARAŞDIRMA