Azərbaycan Bəstəkarlar İttifaqında (ABİ) 20 Yanvar faciəsinin ildönümünə həsr olunmuş anım tədbiri keçirilib.

Kulis.az xəbər verir ki, tədbirdə çıxış edən Azərbaycan Bəstəkarlar İttifaqının sədri, AMEA-nın müxbir üzvü, Xalq artisti, professor Firəngiz Əlizadə 1990-cı il 20 Yanvarda Bakıda mülki əhaliyə qarşı törədilmiş dəhşətli faciə haqda məlumat verib.

Azərbaycan xalqının Ümummilli Lideri Heydər Əliyevin bu hadisələrə ilk dəfə siyasi qiymət verməsi, onu beynəlxalq ictimaiyyətin diqqətinə çatdırılmasını xüsusi vurğulayıb. Həmçinin Firəngiz Əlizadə bu faciə ilə əlaqədar Azərbaycan bəstəkarlarının çoxlu sayda əsərlərinin siyahısını təqdim etməklə, bu əsərlər haqqında fikirlərini bölüşüb.

Tədbirdə sənətşünaslıq üzrə fəlsəfə doktoru, Azərbaycan Milli Konservatoriyasının professoru Jalə Qulamova “20 Yanvar faciəsinin Azərbaycan musiqi mədəniyyətində bədii-estetik təcəssümü”, sənətşünaslıq üzrə fəlsəfə doktoru, dosent Leyla Quliyeva “Simfonik musiqidə 20 Yanvar mövzusu” adlı məruzələri dinlənilib.

Məruzələrdən sonra ABİ-nın katibi, Əməkdar incəsənət xadimi, professor Elnara Dadaşova, İdarə Heyətinin üzvləri, Əməkdar incəsənət xadimi Məmmədağa Umudov, bəstəkar Rəna Qədimova, fəlsəfə elmləri doktoru, professor Mina Hacıyeva və başqaları çıxış etmişlər.

Tədbirin bədii hissəsində bəstəkar Tahir Əkbərin solistlər, xor, bədii qiraətçi, azan və simfonik orkestr üçün “Ya Rəbb” poema-kompozisiyasının audiolent yazısı nümayiş olunub.

• "Dəlisi ağıllı kimi, ağıllısı dəli kimi millətim heeey!"- “Səksənincilər" layihəsindən Əlisəmid Kürün şeirləri
• İnsanı nə xoşbəxt edir? - Ömər Xəyyamın min il əvvəl söylədikləri
• "Met Gala 2026"in mövzusu açıqlandı