Kulis.az Aqşin Yeniseyin "124 min peyğəmbərin basdırdığı dəyər" adlı yazısını təqdim edir.

Mövcud sivilizasiya ailə üzərinə qurulub.

Mülkiyyət anlayışı üzərinə.

Səthi qatda nə baş verməsindən asılı olmayaraq təməl ailədir. Ailə dağılacaqsa, mövcud sivilizasiya dağılacaq. Bu sivizasiyanı yaradan və yaşadan bütün dəyərlər yox olacaq: Təktanrılıqdan tutmuş makdonalds çizburgerinə qədər hər şey başa çatacaq.

Ailədən imtina etmək bütün bu sivilizasiyadan, onun bütün dəyərlərindən imtina etmək deməkdir.
Ailənin dağılması musəvi, xristian, müsəlman olmamaq deməkdir, heç bir yerdə işləməmək deməkdir, heç bir banka pul qoymamaq deməkdir və s.

Çünki bütün bunlar son nəticə olaraq ailəni bəsləyən təssisatlardır. Yəni sən öz ailəni dağıdıb əldə etdiyin azadlıqla başqa ailənin daha xoş gün görməsi üçün yaşayırsan. Nəticədə sənin olmayan bir ailənin köləsi durumuna düşürsən.

Meşədə yaşamadığın müddətcə kölə olmağa da məhkumsan.

"İqtisadi azadlıq" dediyin şey bu köləliyə qoyulmuş təmtəraqlı addır.

Bu gün dağılan ailələrin əksər fərdlərinin azadlığına baxın: hansısa şirkətdə, bankda, ofisdə və s. strukturlarda başqa bir ailənin rifahı üçün can qoyan ailəsiz kölələr deyillərmi bu adamlar?

Bu gün dağılan şey ailə deyil, sıravi kişi-qadın münasibətləridir, yəni böyük ağacın mövsümi tökülən yarpaqları. Bu ağac öz yarpaqlarını mütəmadi özü tökür ki, kökünün sağlamlığını qorusun.

Küftə-bozbaşın duzuna, ya da ayfona-zada görə ailə dağıdanlar zənn etməsinlər ki, sivilizasiyanın təməlini, kökünü sarsıdırlar.

O kökü hər şeydən əvvəl 124 min peyğəmbər basdırıb ora, sən burda birinin öhdəsindən gələ bilmirsən.

• Rəssamlıqda opalizm məktəbini yaradan, əsərləri Avropa Parlamentində sərgilənən Azərbaycan rəssamı - Günün tablosu
• "Messinin sevimli qolu" əsəri satıldı
• “Her şey yolunda” filminin posteri yayıldı