Dünyanın nüfuzlu film mükafatlarından olan "Qızıl Qlobus" Film Mükafatları açıqlanıb.
Kulis.az xarici mediaya istinadən xəbər verir ki, Hollivud Xarici Media Birliyi tərəfindən müəyyənləşdirilən film və televiziya aləminin ən yaxşıları, epidemiya səbəbilə tarixdə ilk dəfə onlayn keçirilən 78-ci "Qızıl Qlobus" Film Mükafatı sahiblərinə təqdim olundu.
“Ən yaxşı dramatik film” nominasiyasında Xloui Çjaonun “Köçərilər torpağı” filmi qalib olub. “Birləşmiş Ştatlar Billi Holideyə qarşı” filmindəki roluna görə Andra Dey “Dram üzrə ən yaxşı qadın rolu” nominasiyasında fərqlənib.
“Dram üzrə ən yaxşı kişi rolu” nominasiyasında isə ölümündən sonra aktyor Çedvik Bouzman seçilib. Ceyson Uolinerin “Borat 2” ekran işi “Ən yaxşı komediya” nominasiyasında qalib olub. “Qızıl Qlobus”un fikrincə, ötən ilin ən yaxşı ssenarisi Aaron Sorkinin “Çikaqo yeddiliyinin məhkəməsi” işinə görə olub.
“Ən yaxşı mini serial” nominasiyasında “Kraliçanın gedişi”, “Ən yaxşı dramatik serial” nominasiyasında “Tac”, “Ən yaxşı komediya serialı” nominasiyasında “Şitts Krik” serialları seçilib.
İkinci plan roluna görə Deniel Kaluya və Cudi Foster fərqləniblər. Xarici dildə ən yaxşı film Amerika rejissoru Li Ayzek Çunun “Minari” , ən yaxşı animaisya isə “Ruh” filmləri olub.
“Qızıl Qlobus” 1944-cü ildən başlayaraq hər il, 20-dən çox kateqoriyada təqdim olunur. Kino dünyasında nüfuzlu mükafatlardan hesab edilir.
