Elşad Barat
Qalx ayağa, sarıl qanlı silaha!
Bu gecədən alov apar sabaha,
Vətən sənə oğul deyər bir daha,
Balasından aralımı ver mənə.
Vətən oğlu, Xocalımı ver mənə!
Al erməni quduzunun canını,
Azadlığın yaşad həyəcanını,
Sil Vətənin sinəsinin qanını,
O, ürəyi yaralımı ver mənə.
Vətən oğlu, Xocalımı ver mənə!
Hey alışdı, elə yandı Xocalım,
Qəm içində çalxalandı Xocalım,
Yalanlara çox inandı Xocalım,
Sən o başı bəlalımı ver mənə.
Vətən oğlu, Xocalımı ver mənə!
Tutulmaram sevincli göz yaşına,
Dolanaram dağlarının başına,
Sarılaram qayasına, daşına,
Öz elimi, mahalımı ver mənə.
Vətən oğlu, Xocalımı ver mənə!
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
