​"Paramaunt+" platformasının ən böyük layihələrindən biri olan və məşhur rejissor Qay Riçinin icraçı prodüserliyini etdiyi "MobLand" kriminal serialı televiziya dünyasını sarsıdan böyük bir ayrılıq xəbəri ilə gündəmə gəlib.

Kulis.az xəbər verir ki, serialda nüfuzlu Harriqan cinayətkar ailəsinin hörmətli cəza icraçısı və problem həll edəni Harri Da Souza obrazını canlandıran dünyaca məşhur aktyor Tom Hardi prodüser qrupu ilə yaşadığı kəskin münaqişələr nəticəsində layihədən qovulub.
​

Bu ilin sonlarında ikinci mövsümü ilə ekranlara dönməyə hazırlaşan ekran işində Tom Hardi 3-cü mövsüm üçün müqaviləsində qarşılıqlı seçim hüququ olmasına baxmayaraq, layihədən tamamilə uzaqlaşdırılıb.

​Gecikmələr, müdaxilələr və bitməyən kaprizlər
​

"Pak Nyus" nəşri tərəfindən yayılan və kino dünyasını hərəkətə gətirən hesabatına görə, Tom Hardi ilə serialın prodüserləri Cez Batteruort və Devid Qlasser arasında ikinci mövsümün inkişaf prosesi zamanı böyük qarşıdurmalar yaşanıb.
​

Çəkiliş meydançasına yaxın mənbələr iddia edir ki, Hardi çəkilişlərə dəfələrlə gecikib, dialoqları özbaşına dəyişdirməyə çalışıb və davamlı olaraq rejissor və ssenaristlərin işinə qarışaraq seriala öz qeydlərini sırımağa cəhd edib.
​

Qısqanclıq böhranı: "Ya o gedəcək, ya da mən!"
​

Problemin yaranmasında əsas səbəbin isə aktyorun rol qısqanclığı olduğu bildirilir. Başlanğıcda tamamilə Tom Hardinin obrazı üzərində qurulan serialın zamanla Pirs Brosnan, Helen Mirren, Peddi Konsidayn və Coan Froqqat kimi aktyorların iştirakı ilə genişlənməsi məşhur aktyoru hövsələdən çıxarıb.
​

Hardinin bitmək bilməyən narazılığı ssenarist Cez Batteruortun rəhbərliyə sərt şərt qoymasına səbəb olub:
​

"Ya o gedəcək, ya da mən!"
​

Sonda "Paramaunt" rəhbərliyi seçimini ssenaristdən yana edərək ulduz aktyor Tom Hardi ilə yollarını ayırmaq qərarına gəlib.

• "TikTok"dan qlobal musiqi səhnəsinə gələn müğənni debüt albomundan danışdı
• Qudurğanlıq zorbalığın ən yaxın dostudur - Rafiq Ələkbər
• İzabel Alyende bir milyon avroluq mükafat qazandı — Romanını təxəllüslə təqdim etmişdi