Amerikalı rejissor Oliver Stoun "Snouden" (2016) ekran işindən 10 il sonra ilk tammetrajlı bədii filmini çəkəcək.

Kulis.az xəbər verir ki, bu barədə Bolqarıstanın "24 çasa" qəzeti məlumat yayıb.

Stoun "Ağ yalan" adlı yeni filminin çəkilişləri üçün artıq Bolqarıstanın paytaxtı Sofiyaya gəlib və buradakı proses həftənin sonuna qədər davam edəcək. Sofiya layihənin beynəlxalq çəkiliş qrafikində həlledici məkandır. Ekran işinin digər səhnələri isə Roma və Banqkokda lentə alınacaq.

Filmin süjet xətti üç fərqli nəslin dilindən nəql edilir. Baş rolu isə "Oppenheymer" və "Fakültə" kimi məşhur filmlərdən tanıdığımız ulduz aktyor Coş Hartnett canlandıracaq.

Hazırda 79 yaşı olan üçqat "Oskar" mükafatçısı (Stoun bu mükafatları "Gecə ekspresi" və "Taqım" filmlərinə görə qazanıb) sonuncu bədii filmini 2016-cı ildə təqdim edib. "Snouden" adlı bioqrafik film ABŞ xüsusi xidmət orqanlarının milyonlarla insanı gizli şəkildə izləməsi proqramını ifşa edən keçmiş xəfiyyə Edvard Snoudenin qalmaqallı həyat hekayəsindən bəhs edirdi.

Qeyd edək ki, kino xadimi siyasi mövqeyi ilə də tez-tez gündəmə gəlir. O, 2025-ci ildə verdiyi açıqlamada Moskvaya səfər etməyi çox sevdiyini xüsusi vurğulamışdı.

Stoun 2015-2019-cu illər arasında Rusiya prezidenti Vladimir Putinlə bir neçə dəfə görüşüb. Qeyri-rəsmi söhbətlərdən tutmuş geniş müsahibələrə qədər müxtəlif formatlarda baş tutan bu görüşlərin sayı 10-a yaxındır. Hətta 2019-cu ildə Putin amerikalı rejissorun Ukraynadakı hadisələrlə bağlı çəkdiyi sənədli film üçün ona xüsusi müsahibə də vermişdi.

• Bir alim ömrü - Nigar Babayeva
• "Evlilik müharibəyə getmək kimi bir macəradır..." - Tanınmış ingilis yazıçıdan aforizmlər
• "Yaşamaq gələcəyin xatirələrini qurmaqdan ibarətdir..." - Məşhur argentinalı yazıçıdan sitatlar