Aktrisa Keyt Uinslet anadangəlmə görmə məhdudiyyəti olan 14 yaşlı kino pərəstişkarı Erinlə onun "Sehrli ağacla yuxarı" filmini izləmək üçün 140 mil yol qət etdiyini öyrəndikdən sonra əlaqə saxlayıb.

Kulis.az xəbər verir ki, bu barədə "BBC" məlumat yayıb.

İrlandiyanın Brukboro kəndinin gənc sakini audioseans üçün üç saatlıq səfərə çıxmağa qərar verib. Qız etiraf edib ki, ən yaxın kinoteatrlarda xüsusi qulaqlıqlar olmadığı üçün kinoya tez-tez getmir. Lakin o, Enid Blaytonun kitablar seriyasının ekranlaşdırılmasını görməyi çox istəyirdi, çünki yazıçının əsərlərinə pərəstiş edir.

"BBC" qeyd edir ki, Uinslet Erinin hekayəsindən çox təsirlənib və filmin prodüseri ilə birlikdə gənc pərəstişkarla videozəng təşkil edib. Söhbət zamanı 14 yaşlı irlandiyalı qızın sevincindən az qala nitqi tutulub və təəssüratlarını belə bölüşüb:

"Keytin səsini dərhal tanıdım, amma bu mənim üçün böyük şok idi!"

Uinslet Erinlə söhbətdən valeh olduğunu və onun qət etməli olduğu məsafədən tamamilə sarsıldığını etiraf edib. Prodüser Pippa Harris isə öz növbəsində bütün kino sənayesi adından qızdan üzr istəyərək bunları qeyd edib:

"Bəlkə də bu, kinoteatrlara əlavə təzyiq göstərəcək və heç bir başqa uşaq film izləmək üçün sizin qədər uzağa getmək məcburiyyətində qalmayacaq. Bu, həqiqətən, dəhşətlidir."

Məlumata görə, zəngdən sonra Erin xoşbəxtlikdən ağlayıb. O ümid edir ki, Uinsletin dəstəyi görmə qüsurlu tamaşaçılar üçün kinonun əlçatanlığı probleminə diqqət çəkəcək.

• Rüstəm Behrudinin "Salam, dar ağacı" şeiri türk serialında səsləndirildi
• "Sən bilən, qocalar niyə tez dururlar?" - "Qoca və dəniz" əsərindən bir hissə
• "Meksikanın Çarli Çaplini" adlandırılan Kantinflasın 3 əsas rolu