İsveçli sənədli film rejissoru Mikael Silkeberq Naxçıvanda film çəkilişlərinə başlayıb.

APA xəbər verir ki, isveçli rejissor jurnalistlərə açıqlamasında bildirb ki, bu, Naxçıvana üçüncü səfəridir: "40 dəqiqəlik filmdə Naxçıvan insan sivilizasiyasının qədim beşiklərindən biri kimi təqdim edilir. Filmdə mən Naxçıvanı canlı bir arxiv kimi göstərməyə çalışmışam. “Azərbaycanın Maçu Piçusu” adlandırılan möhtəşəm məkanı - Əlincə qalası kimi qədim qalaları, Ordubadın tarixi şəhər mühitini, o cümlədən unikal Qeysəriyyə kompleksini, insan yaradıcılığının ən qədim izlərini daşıyan Gəmiqaya qayaüstü təsvirlərini, həmçinin mənəvi dəyərlərin və yerli inancların bu gün də yaşadığı müqəddəs Əshabi-Kəhf ziyarətgahını lentə aldıq".

Mikael Silkeberq qeyd edib ki, “Yaddaşda yaşayan Vətən” adlı film Naxçıvanın zəngin intellektual və bədii irsini də əks etdirir.

Qeyd olunub ki, rejissorun bundan öncə çəkdiyi "Nuhun izləri” filmi Avropa da daxil olmaqla bir sıra ölkələrdə də nümayiş etdirilib.

“Yaddaşda yaşayan Vətən” filmi Cənubi Qafqazda məcburi köçkünlük yaşamış azərbaycanlıların mədəni irsinə, eləcə də mədəniyyətin yaddaş, sənət və ənənələr vasitəsilə necə yaşamaqda davam etdiyinə həsr olunub:

"Naxçıvan bu film üçün təbii və vacib çəkiliş məkanıdır. Bu, təkcə onun coğrafi yaxınlığı ilə deyil, həm də bu irslə dərin mədəni, musiqi və kulinariya bağlılıqları ilə əlaqədardır. Mən hiss edirəm ki, Skandinaviya ilə bu region arasında təbii bir yaxınlıq var. Hər iki məkanda insanlar yaxşı anlayır ki, landşaft, yaddaş və kimlik bir-biri ilə sıx bağlıdır. Hər iki mədəniyyətdə təbiət, tarix və mədəniyyət ayrılmazdır. Bu film eyni zamanda daha geniş bir dialoqun bir hissəsidi - Şimal və Cənub arasında, Skandinaviya ilə Azərbaycan arasında mədəni körpüdür. Ümid edirəm ki, bu sənədli film vasitəsilə beynəlxalq auditoriya Azərbaycanı yalnız mətbuat xəbərlərindən deyil, onun mədəniyyəti, insanları və insani hekayələri vasitəsilə tanıyacaq".

• Monenin indiyədək bilinməyən tabloları Parisdə hərraca çıxarılır
• Zöhrab Adıgözəlzadə: "Heydər Əliyev mədəniyyət xadimlərinə həmişə böyük diqqətlə yanaşıb..." - Tarixi Şəxsiyyət
• "Namazov" filminin treyleri yayımlandı