Las-Veqasda keçirilən "CinemaCon" tədbirinin ikinci günündə "Warner Bros." studiyası kanadalı rejissor Deni Vilnyövün epik saqa-trilogiyasının sonuncu hissəsi olan "Dyun: Üçüncü hissə" (Dune: Part Three) filminin ilk kadrlarını nümayiş etdirib.

Kulis.az xəbər verir ki, rejissor tədbir iştirakçılarına filmin ilk 7 dəqiqəsini təqdim edib.

Kadrlarda döyüşə göndərilən döyüşçü qrupunun gəmisində qeyri-müəyyən taleyə hazırlaşaraq zikr etmələri və yerdən çıxan nəhəng qüllədən açılan şiddətli atəş səhnələri yer alıb.

17 illik zaman fərqi və yeni janr

Səhnəyə "Fremen" geyimində olan böyük bir heyətlə çıxan Deni Vilnyöv filmin əvvəlki hissələrdən tamamilə fərqli olacağını bildirib. Rejissorun sözlərinə görə, əgər birinci film "meditativ", ikinci film "müharibə dramı" idisə, üçüncu hissə daha çox triller janrında olacaq:

"Hadisələr ikinci hissədən 17 il sonra cərəyan edir və bu, tamamilə fərqli bir dünyadır. Pol öz hərəkətlərinin və qərarlarının nəticələri ilə üz-üzədir. Bu, daha çox bağışlanma hekayəsidir... Lakin filmin ürəyi Çani və Pol arasındakı sevgi hekayəsidir".

Aktyor heyəti və yeni personajlar

Tədbirdə rejissorla bərabər Timoti Şalame, Zendaya və Ceyson Momoa da iştirak edib.

Layihənin ən maraqlı yeniliklərindən biri Ceyson Momoanın qayıdışıdır. Aktyor izah edib ki, onun yeni personajı birinci filmdə həlak olan Dunkan Aydahonun hüceyrələrindən yaradılmış Heyt (Hayt) adlı varlıqdır.

Filmin əsas detalları:

Mənbə: Frenk Herbertin 1969-cu ildə nəşr olunan "Dyünün müshəfi" romanı əsasında çəkilib.

Yeni simalar: Robert Pattinson və İsaak de Bankole heyətə yeni qatılan adlar arasındadır.

Rekord: İlk iki film ümumilikdə 15 nominasiya üzrə 8 "Oskar" qazanıb və 1,1 milyard dollardan çox gəlir əldə edib.

Qeyd edək ki, "Dyun: Üçüncü hissə" filminin 18 dekabr tarixində kinoteatrlarda nümayiş olunacağı gözlənilir.

• "Bu dünyada xoşbəxtlik təsadüfən gəlir..." - Nataniel Hotorndan sitatlar
• İçərişəhər tarixində ilk
• Qəşəm Nəcəfzadə ilə Biləsuvar, İmişli və Sabirabadda oxucularla görüş keçirildi