Kinoşünas Sevda Sultanova tanınmış rejissor Hilal Baydarovun son müsahibəsi barədə təəssüratlarını şəxsi teleqram kanalında bölüşüb.

Kulis.az xəbər verir ki, o, rejissorla bir neçə dəfə rastlaşdığını və onun müsbət enerjisini hiss etdiyini vurğulayıb:

“Hilalın çox xoş aurası var, onunla söhbət etmək zövqlüdür. Amma bu dəfəki müsahibəsi mənə maraqlı gəlmədi. Fikirləri bir qədər ziddiyyətli idi”.

Sultanova qeyd edir ki, rejissorun sənətə yanaşmasında paradoksal məqamlar diqqət çəkir:

"Hilal deyir: “Realizm deyilən şey sənətin düşmənidir. Ona görə ictimai, sosial, məişət mövzulu filmlər məndə ikrah hissi yaradır, baxa bilmirəm. Əhməd əmi evinə 300 manat apara bilmir, uşağının problemi var – çox gözəl, drama dəhşət. Amma bu, kino deyil, hansısa nazirliyin problemidir”.

Kinoşünas bildirir ki, rejissorun bu fikirlərindən sonra özünün gündəlik məişət problemi barədə emosional danışması ziddiyyətli təsir bağışlayıb:

“Allahla problemim yoxdur, amma yaratdığı dünyadan nifrət edirəm. Palçığa bulaşıram. Mən Masazırda, Cantəpədə qalırdım. Geyinməyi xoşlayıram, amma geyinib şəhərə təmiz gəlmək ehtimalım yoxdur. O palçıqdan Xırdalan dairəsinə çıxmaq üçün bir saat vaxt lazımdır. Ayaqqabımın təmiz qalma ehtimalı yoxdur, halbuki səliqəli gəzməyi xoşlayıram”.

Sevda Sultanova qeyd edir ki, sosial problemləri kinoda “nazirliyin işi” sayan, amma real həyatda bu problemlərdən əziyyət çəkən rejissorun bu yanaşması təzad yaradır:

“Sosial reallığı sənətdə iyrənc sayan, amma həmin reallığın içində emosional yanğı ilə yaşayan Hilalın müsahibəsi ziddiyyətlərlə dolu idi”.

• “20 Yanvar – milli yaddaşımızın iradə gücü” adlı anım tədbiri keçirildi
• Güllələr demədi geri qayıdın – İsa İsmayılzadə
• Azərbaycan arxeologiyasının sarbanı - O, Qobustanla bağlı nəyi sübuta yetirmişdi?