Kino Agentliyinin və Azərbaycan Dövlət Mədəniyyət və İncəsənət Universitetinin nəzdində fəaliyyət göstərən “Tədris Film” studiyasının ortaq layihəsi olan tələbə filmlərinin iştirakçıları 6 aydan çoxdur ki, ödənişlərinin köçürülmədiyini bildiriblər.

Rejissor Mirzahid Ağayev Kulis.az-a açıqlamasında bildirib ki, filmin çəkilişi 25 iyulda bitib:

"Mən öz variantımı iki gün əvvəl bitirmişəm, ancaq filmin ARKA-ya göndərilən variantı avqustun 17-si tamamlanıb və ARKA-nın göndərdiyi prodüser Kamal Müşfiqə təhvil verilib. Proseslər çox ləng gedirdi. Mənə rekvizitləri almaq üçün pul köçürülməli idi. Ancaq bu günə qədər də pul köçürülməyib".

Rejissor "Tədris-film" ona filmi ləğv edəcəklərini deyib: "Bundan əvvəl də bir filmin çəkilişini ləğv etmişdilər. Onun pulu hara getdi, heç o da bilinmir".

Mirzahid Ağayev bildirib ki, ARKA-nın əməkdaşı onlara problemin "Tədris-film"dən qaynaqlandığını deyib.

Rejissor Xəyal Abbasov da bildirib ki, onun filminin çəkilişi bu il avqustun 3-də bitib. Lakin pulun ödənilməsi hələ də gecikir.

ARKA-nın istehsalat şöbəsinin əməkdaşı Orxan Behbud kulis.az-a bildirib ki, ödənişlər gələn həftə ərzində köçürüləcək.

"Mən bu filmlərin maliyyə problemi ilə bağlı tələbələrlə görüşməmişəm. Ümumilikdə istehsalla bağlı həmişə dəstək olmuşam. Özləri də deyə bilər. Bundan əvvəl maliyyə şöbəsi tərəfindən 8 filmin pulu köçürülüb.

Onlar keçən həftənin cümə günü Azərbaycan Respublikasının Kino Agentliyinin maliyyə şöbəsinə sənəd veriblər. Müqavilənin şərtlərinə əsasən pullar 15 gün ərzində köçürülə bilər. Hazırda maliyyə şöbəsində sənədlər yoxlanılır, ya bu, ya da gələn həftə pullar köçürüləcək. Sənədlərdə qaimələrin nə vaxt vurulduğu, ümumi ödəniş tapşırıqlarının nə vaxt olduğu açıq-aşkar göstərilir. ARKA ancaq şirkət tərəfindən təyin olunan sənədlərə uyğun olaraq ödənişi həyata keçirir. Sənəd təqdim olunmayıbsa, ödəniş edilə bilməz".

• Sirli dərd - Knut Hamsunun hekayəsi
• Macar rəssamın sərgisi açıldı – “İşığın səssizliyi”
• Gənclər Kitabxanasından təqdimat: “Gənclik bu günümüz, gələcəyimizdir!”