26 dekabr 2025-ci il tarixində “8” serialının təqdimatı İMAX kinoteatrında baş tutub.

Kulis.az xəbər verir ki, tədbirdə layihənin yaradıcı heyəti, media nümayəndələri və dəvətli qonaqlar iştirak ediblər.

Serialın baş prodüseri İslam Ağa, ideya müəllifi və quruluşçu rejissoru isə Hikmət Rəhimovdur.

Layihənin ssenarisi Azər Səlimli, Könül İsayeva-Səlimli, Könül Məmmədova və İslam Qasım tərəfindən qələmə alınıb.

Ekran işinin təsvir rejissoru Tofiq Əliyev, rejissoru İmran Ali Qurban, quruluşçu rəssamı Chevugara, səs operatoru Sənan Güləhmədzadədir. Geyim üzrə Lətif İsmayıllı, qrim üzrə isə Eldar İsrafilov çalışıb. Serialın icraçı prodüseri Aydın Səlimli, montajçısı Ulvi Babayev, rəng korreksiyası isə İman İmanovdur.

Təqdimat zamanı “8” serialının birinci seriyası nümayiş etdirilib.

Serial məktəbli qızın intiharından sonra baş qəhrəmanın həyatının tamamilə dağılmasından bəhs edir. Bu faciəvi hadisə illərdir qəhrəmanın daxilində gizli qalmış uşaqlıq travmalarını üzə çıxarır. Yaşadığı ağrı isə zamanla qisas istəyinə çevrilir.

Qızının ölümündə günahkar bildiyi insanları cəzalandırmağa başlayan baş qəhrəman keçmiş həyat yoldaşı, biganə tibb bacısı, məktəb direktoru və ən yaxın çevrəsi ilə üz-üzə qalır. Hər bir qətl onu azad etməli olduğu halda, əksinə, daha dərin bir qaranlığa sürükləyir.

Cəmiyyətdə sakit və mehriban biri kimi tanınan bu kişi, daxilində tamam başqa – dağıdıcı və təhlükəli bir simanı gizlədir. “8” serialı travma, günah, intiqam və insanın içindəki qaranlıqla üzləşməsi mövzularını kəskin dramatik xəttlə tamaşaçıya təqdim edir.

Qeyd edək ki, serialın 2-ci seriyası 8 yanvar saat 20:00-da İMAX-da nümayiş olunacaq. İlk seriya isə yanvarın 5-i ARB TV-də göstəriləcək.

• Pabın qaranlığından səhnənin zirvəsinə... - Məşhur "Sultans of Swing" necə yarandı?
• "Niyə mən sizi hələ Bakıdaykən tanımamışam?" - Əzizə Cəfərzadə ilə Ramiz Abutalıbovun yazışmaları
• Tahir Salahov: "Heydər Əliyev həmişə maddi nemətlərin fövqündə idi...." - Tarixi Şəxsiyyət