Cavid Zeynallının “Leyla” romanının təqdimatı keçirilib.

“APA Holdinq”də keçirilən təqdimat mərasimində “APA Holdinq”in prezidenti Vüsalə Mahirqızı, “APA Holdinq”in Direktorlar Şurasının sədri Nurşən Quliyev, Lent.az informasiya portalının direktoru Qabil Abbasoğlu, “Azərbaycan” jurnalının baş redaktoru İntiqam Qasımzadə, yazıçı Etimad Başkeçid və başqaları iştirak edib. Kulis.Az-ın verdiyi xəbərdə belə deyilir.

“APA Holdinq”in prezidenti Vüsalə Mahirqızı əsəri hələ “Azərbaycan” jurnalında oxuduğunu diqqətə çatdırdı: “Cavidin əsərində ən yaxşı məqam ondan ibarətdir ki, əsər səni sonuna çatmağa vadar edir. Görüm necə bitəcək! Əsərdə bir emosiya var. Süjetin özündə konfliktlər var. Bu baxımdan maraqlı əsərdir. Bənzətmələrə rast gəlmədim. Bu çox sevindirici haldır. Bu gün çox təəssüflər olsun ki, kitab satışı, ümumiyyətlə, kitabla dolanmaq çox çətindir. Arzulayıram ki, gələcəkdə Cavid, o cümlədən digər gənc yazıçılar öz əsərlərindən qazandıqları hesabına özlərini dolandıra bilsinlər”.

“Azərbaycan” jurnalının baş redaktoru İntiqam Qasımzadə “Leyla” romanının ilk oxucusu kimi əsərin ədəbi kriteriyalara cavab verdiyini söylədi: “Bizim redaksiyada bütün materialları təbii olaraq bir adamın oxuması qeyri-mümkündür. Ona görə də materialları işçilər arasında bölürük. Cavidin əsərini isə şəxsən özüm oxudum. Onun ilk əsəri “Günəşi gözləyənlər”i də oxumuşdum. Romanda yerli şou-biznes aləmində baş verən problemlər, insan faciəsindən bəhs olunur. Əsərdə bəzi açıq-saçıq səhnələr var idi ki, mən onları çıxartdım. Açığı, kitab çap olunandan sonra kitabı oxumamışam. Bilmirəm, həmin səhnələr kitaba salınıb, ya yox. Ümumilikdə, əsər yaxşı alınıb. Biz “Azərbaycan” jurnalının iki nömrəsində “Leyla”nı çap etdik. Bu romanın çapından sonra Cavidlə dostlaşdıq. Mən gənc dost qazandım”.

Kitabın redaktoru Etimad Başkeçid isə son günlər romanın müğənni Röya Ayxandan bəhs etməsinə toxundu: “Son günlər yazırlar ki, roman Röyanın həyatından bəhs edir. İstənilən müğənni özünü bu romanda görə bilər. Bu onların problemidir. O ki, qaldı kitaba, onun redaktəsinə, redaktə məsələsində elə bir problem yaşamadım. Çünki Cavid peşəkar yazıçıdır”.

Sonda Cavid Zeynallı da kitab haqda öz fikirlərini çatdırdı: "Leyla bir müğənninin obrazıdır. Və onun timsalında mən Azərbaycan şou-biznesinin çağdaş durumunu və şou-biznes mühitində bir insanın faciəsini göstərməyə çalışmışam. Kifayət qədər həcmli romandır".

Nurşən Quliyev, İlqar Əlfioğlu, Qabil Abbasoğlu, Cavid Cabbaroğlu, Nəsimi Nəbizadə, Kənan Hacı, Qismət də roman haqda fikirlərini bildirdilər.

“Kulisin kitabxanası” seriyasından çap olunan “Leyla” romanında Azərbaycan şou biznesinin ən tanınmış dörd müğənnisinin obrazı yaradılıb.

Kitab "Hədəf" nəşriyyatında çap olunub.

“Leyla” romanı yazıçının sayca ikinci romanıdır. Yazıçının ilk romanı “Günəşi gözləyənlər” 2010-cu ildə işıq üzü görüb.

• "Balaca bir hekayədə bu qədər “hoqqa çıxarmaq” lazım deyil..." - Hekayə müzakirəsi
• Sakrallıq və aldanışların vəhdətində - "Dəccal" - Elnarə Akimova
• Yusuf Akçura millətin inkişafında hansı təməl faktorları önəmli hesab edirdi?