Kulis.Az gənc şair Anar Məcidzadənin şeirlərini təqdim edir.
Ata itkisi
Bu dünyada nə qədər,
Ölüm, itim olarmış.
Dünən atalı olan,
Bu gün yetim olarmış.
Yoxdur atam dünyada,
O, arxamda dağ idi.
Sevinirdim, gülürdüm,
Nə qədər ki sağ idi.
Gör mən nəyi sayırdım,
Fələk də nə sayırmış.
İlahi, vaxtsız ölüm,
Ataya da qıyarmış.
Toyumu görmək idi,
Sənin arzu, muradın.
Sən getsən də ay ata,
Unudulmazdır adın.
Bahar gəlmişdi yurda,
Baharım qışa döndü.
Bu gənc, cavan yaşımda,
Gözlərim yaşa döndü.
Heç kəs əvəz eyləməz,
Nə atanı, ananı.
Ömür boyu bizlərə,
Candan artıq yananı.
Sən öldün, ömrümüzdə,
Soldu çiçək, bənövşə.
Qəlbimdəsən ay ata,
Bu dünyada həmişə.
Sən arif ol, düz yaşa
Sən çoxda ki fikir vermə fələyə,
Tale bir cürə pay verir hərəyə.
Çalış uyma bu dünyada kələyə,
Sən arif ol, məğrur yaşa, düz yaşa.
Bu dünyanın satqını var, mərdi var,
Dözülməyən, çözülməyən dərdi var.
Həyatında qarşımızda şərti var,
Sən arif ol, məğrur yaşa, düz yaşa.
Görən nədir bu dünyanın oyunu,
Səhv salıbdır canavarla qoyunu.
Əməlinlə ucalt adı, soyunu,
Sən arif ol, məğrur yaşa, düz yaşa.
Bu dünyada hər insandan iz qalar,
Xalqına Anardan şeir, söz qalar.
Əyri gedər, ömür boyu düz qalar,
Sən arif ol, məğrur yaşa, düz yaşa.
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
