Kulis.az Ulucay Akifin yeni yazısını təqdim edir.

Dünən həmişəki kimi Ramiz müəllimlə (red. Mehdiyevi demir) işdən evə qayıdırdıq. Yolboyu söhbət eləsək də, radionu asta səsdə açıq saxlayırıq. Ramiz müəllim kanalları mənə həvalə eləyib, deyir ki, mahnıları da, səsi də özün tənzimlə. Mən də tez-tez FM dalğaları ilə oynayıb kanalları dəyişirəm. Fikir vermişəm, həmişə nədənsə adam radioda tanış mahnı, bəlkə də, tanış səs axtarır. Çox vaxt tanımadığımız, gözəl mahnıların üstündən də tez keçirik.

Ancaq bir səs var... o səsi eşidəndə, mütləq əlimizi saxlayır, kanalı dəyişmirik.

O səs Aygün Kazımovanın səsidir.

Mahnını tanısan da, tanımasan da Aygünün səsi gəldisə, FM dalğasını dəyişmirsən. Qəribədir! Onun səsiylə daxili dünyamız arasında bağ yaranıb. Təkcə özümü nəzərdə tutmuram, mənə elə gəlir, bu bağı, etiraf etsə də, etməsə də, 7-dən 70-ə hamı duyur.

Ən kədərli mahnısı da, ən ritmik mahnısı da adamın ürəyinə yol tapır (hər şeyi öz adıyla çağırsaq, adama ləzzət eləyir!).

Dünən də maşının radiosundan Aygünün səsi gələndə Ramiz müəllim ilk dəfə mənə müdaxilə elədi:

– Qoy oxusun, görək nə oxuyur...

Tanıdığımız səs tanımadığımız ritmik mahnını işvəli-işvəli oxuyur və bir yerində ikimiz də gülürük:

“Məni həkimlər gözəlləşdirir,
Səni dəyişdirib salır abra!
Abra! Abra! Abrakadabra!”

İki kişi ilk dəfə eşitdiyi mahnının bu yerində gülürsə, deməli, Aygün düz deyir.

Öz-özümə fikirləşirəm ki, doğrudan da, bəzi şeylər səndə ya olur, ya da olmur.

O şeylərdən biri də gözəllikdir. O qədər estetik əməliyyatlar edən qadınlar tanıyırıq ki, nə qədər çalışsalar, yenə də gözəlləşmirlər.

Cavan-cavan qızlar görürük, iyirmi-otuz yaşında bədəni əldən düşüb, dərisi büzüşüb, əti sallanıb, yüz cərrah da birləşsə, bir şey alındıra bilməz.

Nəysə.

Söhbətimiz Aygünün gözəlliyi deyil. Gözəlliyi bir yana, insana ötürdüyü enerji fantastikdir. Gözəlliyindəki enerji, səsindəki enerji "abrakadabra" eləyib adamı özünə çəkir.

Aygünün səsini eşidib FM dalğasını, TV kanalını dəyişmiriksə, deməli, Aygünlə aramızda o bağ yaranıb. Bir sözlə, onu sevirik.

Aygün Kazımovanın neçə yaşı var, bilmirəm, heç maraqlanmaq niyyətim də yoxdur. Amma görürəm ki, bu gün gənc nəslin dilində də hitə çevrilən mahnılar onundur. Neçə-neçə gənc müğənnilər gəldi, keçdi, amma heç biri Aygünə çata bilmədi. Heç yel olub yanından da ötmədilər. Aygün isə artıq özündən sonrakı neçənci nəsil müğənniləri də yola salır.

İşində bir nömrə olmaq, yəqin, budur!

Qəribədir, Aygün Kazımova haqqında xoş söz deyəndə də, mütləq kimlərsə “səhnəyə yarıçılpaq çıxır”, “qızlarımızı korladı” kimi fikirlər səsləndirirlər.

Maraqlıdır!

Qızlarımız, qadınlarımız hansısa müğənninin səhnə geyimi ilə korlanırsa, vay bizim halımıza, vay sizin halınıza.

Onda özümüzü bütün dünyadan təcrid edək. Ki heç kimi görməyək, pozulmayaq.

Açığı, Aygün Kazımovanın nə geyindiyinin mənə nə fərqi? Onunla evlənmək fikrim yoxdur.

• Dövlət Kamera Orkestrinə yeni dirijor təyin olundu
• Mədəniyyət Nazirliyinin şöbə müdiri: "Dövlət dəstək versə, bütün işsiz-gücsüzlər kitab yazacaq..." - Müsahibə
• “Böyük Qayıdışa aparan yollar” adlı tədbir keçirildi