Kulis.az gənc şair Qismətin yeni şeirlərini təqdim edir.
Birnəfəsə...
Darıxmaq pəncərəsi açıq qalıb,
yellənir səbrin pərdəsi,
fikrimin atı qan-tər içində...
Saçlarını üzündən
yığırsanmı astaca ?
Daralırmı nəfəsin ?
Leysan kimi yastığa
yağırsanmı astaca ?
Mən nə axmaq adamam,
nə axmaq suallardı ?!
Vaxt vardı,
oyanıb görürdüm ki,
tavan başqa tavandı.
Tavan da təəccüblənirdi...
Kəsəsi, öpdüyümüz dodaqlardan
pomada kimi silinmək ehtimalı da var.
Amma səni düşünmək elə gözəl ki,
sənə də məsləhət görürəm...
Hamı kimi durursan yuxudan.
Əllərini yudunmu, çayını içdinmi
başlayır dünənə əkiz bir gün.
Kontur göndərirsən rəfiqənə,
nömrəni dəyişmək istəyirsən,
Facebook-a öyrəşə bilmirsən...
Filmə baxırsan,
yeməyi qızdırırsan,
qeybət eləyirsən yüngülvari...
Çantanla ayaqqabının rəngini tutuşdurursan,
necəsə şalvarını köynəyə yaraşdırırsan,
qəşəng görünürsən insafsızca...
Gülümsəyirsən kiminsə zarafatına,
yorulursan, mürgüləyirsən divandaca
yastığa toxunur saçların, çiynin...
Oyanırsan, güzgüyə baxırsan.
Güzgün olum,
yadıma düşürsən çilik-çilik oluram.
Adını bir vərəqə yazıb baxıram.
Adın gözlərimdən başlayıb fəth edir
ürəyimin paytaxtını.
Yuxularıma tökülür saçların...
Sonra nəsə olur,
adın ayrı-ayrı mənalara bürünür,
bax, onda
əllərin “qucaqlaşmaq”,
dodaqların “öpüşmək”
ayaqların “getməmək” felinə bənzəyir...
Bax, onda
nəsə olur,
sənin acıgöz həsrətin
məni dişinə çəkir.
Bax, onda
darıxmağım qurd kimi ulayır...
Dönüb görərsən ki…
Bir də görərsən ki, qəti alınmır…
Səni gecələrin zülməti çəkər,
Dodağın bir öpüş həsrəti çəkər.
Yanar dodağında bir dodaq yeri
Lap elə mən ölü, sən də ki, diri
Qabları yuyarsan, çörək alarsan,
Görərsən könlünün simi tarımdı.
Amma bilməzsən ki, niyə yarımsan,
Bilməzsən evində nəyin yarımdı…
Könlünə qəfil bir qayıtmaq düşər,
Birdən başlayarsan lap darıxmağa…
Dönərsən gəldiyin yola baxmağa,
Qəhər boğazında ilişər qalar,
Dönüb görərsən ki, divardı yollar,
Dönüb görərsən ki, yol çıxıb gedib…
Bezginlik
Suallar verirlər,
çoxlu suallar…
Niyə? Nədən? Necə?
Cavabını bilmirlər guya.
Zalım uşağı,
səadət ərzaq deyil ki,
tutub doldurasan soyuducuya…
Ehtimal
Axşamlar ağsaqqal qonşumuz
cəhənəm haqqında danışır uşaqlara
odlu-alovlu.
Mən siqaret yandırıb fikrə gedirəm.
Cəhənnəm – bu yəqin cənnəti uzaqdan görməkdi…
Bizi Telegram-da izləyin
t.me/kulis_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
Oxşar xəbərlər
Bizim borcumuz mürgülü xatirələri oyatmaqdır... - Nüsrət Kəsəmənli "Avara" filminə baxanda niyə ağlamışdı?
10:00
29 dekabr 2025
Qarabağ həsrəti ilə dünyadan köçən Şahmar Əkbərzadə - Bəxtiyar Vahabzadə onun haqqında nə yazmışdı?
12:00
28 dekabr 2025
"Eyni aqibət Mehdini də gözləyir!" - Hekayə müzakirəsi
12:00
24 dekabr 2025
Corc Eliota çevrilən Marian Evans - O, hansı məşhur filosofdan təsirlənmişdi?
17:00
22 dekabr 2025
"Hər bədbəxt qadının arxasında başqa bir qadının imzası dayanır" - Qadınlar bir-birinin həyatını necə məhv edir?
15:00
22 dekabr 2025
"İçimizdə xortdan saxlayırmışıq!..” - Emili Bronte əsərində hansı ağlasığmaz ehtirasları təsvir etmişdi?
15:00
19 dekabr 2025
