Kulis.az “Maksumum 400” layihəsi davam edir.

Layihənin şərtinə əsasən yazılar 400 işarəni keçməməlidir.

Hər dəfə layihədə 4 yazar iştirak edəcək.

Maksimum 400-cün ikinci seçmələrini təqdim edirik.


Anar Yusifoğlu: ”Sabah elə bu gündür...” (400 işarə)

Komputerimin yaddaşında problem yaranıb, saatı, günü və ili yadda saxlamır. Hər gün komputeri açanda yeni günü yaddaşa yazıram.

Bu ili başdan-başa komputerin bu şıltaqlığı ilə məşğul olmuşam. Beləcə bir-birinə bənzəyən günlərin sıra sayını dəyişir və gözüm önündə əriyən fani ömrümə tamaşa edirəm. Hər sabahın bugünün başqa adı olduğunu seyr etməkdən ayrı əlimizdən nə gəlir ki?!




İlqar Rəsul: Ölülər oteli (207 işarə)

Bir gün Şeyx Nəsrullah gəlib “Qurd qapısı”nda dayanıb deyəcək:

Qalxın ayağa, ey allahın mömin bəndələri !!!

Nəbadə qalxasınız.

Necə yatmısınız, elə də yatın.

Sizin yerinizdə otel tikmək istəyirlər, ölülər....


Aqşin: Dörd sual (391 işarə)


Əli Kərimi kim öldürdü?

1. İstedad. 2. Vətən. 3. İçki. 4. Allah.

Somalidə acından ölən uşağa nə demək lazımdı?

1. Kimin oğlusan? 2. Haralısan? 3. Allaha inanırsan? 4. Bədbəxt məşhursan, xəbərin varmı?

Sizcə, yazar Seymur Baycan indi harada ola bilər?

1. Qaxda 2. Qarabağda 3. Küçədə 4. və otaqda

Sizcə, hansı yaxşıdır?

1. Sevməmək. 2. İstəməmək. 3. Arzulamamaq. 4. Gözləməmək.


Sevda Sultanova: Somali instinkti (324 işarə)

Borca-xərcə, bəhsəbəhsə girib bahalı toy edən azərbaycanlının düşüncəsi ilə acından qan qussa da, dünyaya uşaq gətirən, onu xoşbəxt edə bilməyən somalilinin düşüncəsi eynidir.

Uşağa sahiblik- güclü instinktdir.

Amma insanı başqa canlılardan fərqləndirən onun şüurudursa, onda şüur instinktə qalib gəlməli idi.

Mirmehdi Ağaoğlu: Yazının falı (233 işarə)


Ulduz fallarına marağım olmasa da onlarda həqiqət gizləndiyini fəhm edirəm.

Amma səhər ulduz falında “bu gün əhvalınız yaxşı olmayacaq” oxuyub bütün günü ovqatı təlx gəzməyin də səbəbi yazının təsirindədir.

Falda deyil.


Pərvin Abbasov: Dünyanın bir anı (399 işarə)

Bakıda Mamed adlı taksi sürücüsünün maşındaca ürəyi dayandı.

Messi “Real”a vurduğu qolu bayram edirdi.

Dünya Qəddafinin ölüb-ölmədiyindən danışırdı.

Bir də, iqtisadi böhrandan danışırdılar.

“Facebook” şərhlərdən dağılırdı.

Dünyanın Mamedin ölümündən xəbəri yoxdu.

Mamedin arvadı Məsmə və beş uşağı da dünyada olanları bilmirdi.

Onlar sadəcə ağlayırdı.

Mameddən çox, öz hallarına.


Cəlil Cavanşir: Gücü anlamaq (287 işarə)

İntihar gücsüzlük deyil.
İlk dəfə intihara cəhd edəndə anladım insanın çox güclü olduğunu.
Əvvəllər bu qədər güclü olduğumu dərk etməmişdim.
Son intihar cəhdimdə özümə inandım.
Yaşamağı bacardım.
Sadəcə inanmaq və daxili enerjini səfərbər eləmək lazımmış və bir də yaşamaq...

Asəf Quliyev: Ayaqqabı (384 işarə)
‎
- Mənə bir ayaqqabı verin.

- Anan ölsün. Hanı ayaqqabın?

- Bu axşam Xocalıda qırğın olub. Köməyə getmişdik. Meşədə ayaqyalın bir qadın tapdım. Ayaqqabımı ona verdim.

- Səndən başqa adam yox idi?

- Mən də fikirləşdim ki, anam deyəcək “südüm sənə halal olsun”.

- Südüm sənə halal olsun bala.

10 gün sonra Samir döyüşdə həlak olur.

Ayaqqabısını verdiyi qadın 10 il xilaskarını axtarır.

• Ələkbər Tağıyev kimdir?
• Elməddin Cəfərov: "Heç vaxt qadın paltarı geyinmərəm" - Müsahibə
• “Şizofreniyanın diaqnozu olan əsərlər var” – Tanınmış rəssamın evindən reportaj