16 mart – 16 iyun tarixlərində nonkonformist rəssam Əşrəf Muradın "Sevgi və etiraz" adlı ilk genişmiqyaslı retrospektiv sərgisi keçiriləcək.
ONA xəbər verir ki, sərgini YARAT Müasir İncəsənət Məkanı təqdim edir.
Sərgi həm Azərbaycanın, həm də xarici ölkələrin fərdi və ictimai kolleksiyalarında saxlanılan əsərlərdən toplanıb, bir çoxları geniş ictimaiyyətə ilk dəfə təqdim olunacaq.
Sərgi 50-dən çox əsərlə rəssamın yaradıcılığının tam spektrini əhatə edir, bir çox rəsmləri, eskizi, albom qaralamaları, rəngkarlıq nümunələri, eləcə də fotoşəkilləri və digər materialları bir araya gətirir.
Əşrəf Muradın 1950-ci illərin sonlarından başlayaraq ölümünə qədər (1979-cu il) yaratdığı əsərləri özündə cəmləşdirən ekspozisiya sənətkarı möhtəşəm realist rəssam və dövrünün siyasi mühitinin həssas təfsirçisi kimi təqdim edir.
Sərgidə Əşrəf Muradın R.Mustafayev adına Azərbaycan Milli İncəsənət Muzeyində, Azərbaycan Dövlət Rəsm Qalereyasında, Azərbaycan Rəssamlar İttifaqında, Müasir İncəsənət Muzeyində (Bakı), Nar qalereyasında, eləcə Fərhad Əhmədovun, Fərhad Xəlilovun, Rəşad Babayevin, Elçin Səfərovun, Xəyyam Mirzəzadənin kolleksiyalarında yer almış əsərləri və Ramiz Abutalıbovun, Rafael Gülməmmədovun və Vüqar Muradovun arxivlərindən rəssama aid materiallar nümayiş olunur.
Sərgi XX-XXI əsrlər Azərbaycan Rəngkarlığı Muzeyində keçiriləcək.
