Atamın sevişdiyi gənc qızı iki dəfə görüşə çağırdım

Kulis.Az amerika şairi və yazıçısı Çarlz Bukovksinin şeirlərini təqdim edir 

 

Rəhmətlik atam

 

Atam görüb-götürmüş adam idi.

Həyatda özünə görə bir ideyası vardı.

Deyərdi:

«Oğulbala, bax,

mən ömrümün axırınacan

bu ev üçün ödənişlər etsəm,

o, mənimki olacaq.

Dünyadan köçəndə onu

sənə miras qoyacağam.

Sən də

ömrün boyu işləyib

özünə ev ala bilsən,

onda iki evin olacaq

və sən

bu evləri öz oğluna

miras qoya biləcəksən.

Əgər o da bir ömür əlləşib-vuruşmaqla,  

özünə ev ala bilsə,

sən öləndən sonra oğlunun…»

 

«Qoy sən deyən olsun» - deyərdim ona.

 

Bir stəkan su içdiyi yerdəcə keçinən atamı

mən qara torpağa tapşırdım. 

Tabutu palıdı rəngdəydi, iriydi.

Dəfndən dərhal sonra mən

stadiona yollandım və orada

ucaboylu sarışın bir qızla tanış oldum.

Cıdır yarışından sonra

onun evinə getdik ki,

yeyib-içək və əylənək.

 

Atamdan qalan evi düz bir ay sonra satdım.

Onun maşınını və mebelini də satışa çıxartdım.

Birini çıxmaq şərtiylə,

bütün tablolarını ona-buna peşkəş elədim.

Hər il yayın bürküsündə

sərin kompotla doldurub, süfrəyə düzdüyü vazaları da

birbəbir satdım getdi.

Onun sevimli itini

Sahibsiz Heyvanlar Bürosuna təhvil verdim.

Ahıl atamın sevişdiyi gənc qızı   

iki dəfə görüşə çağırdım.

Bir şey çıxmayacağını görüncə

bu daşı birdəfəlik ətəyimdən tökdüm.

 

Əlimdəki bütün pulları

qumara qoydum, içkiyə verdim.

 

İndi Hollivuddakı

ucuzvarı bir otaqda özümə sığınacaq tapmışam

və kirəni vermək ötrü

başqalarının zibilini daşımağa məhkumam.       

 

Atam görüb-götürmüş adam idi.

İçdiyi bir stəkan su nəfəs yoluna getdiyindən

o, çeçəyib boğulmuş

və sadəcə xəstəxana arxivində

özündən sonra

bircə sətir iz buraxmışdı.

 

 

Nəbatat düşkünü

 

Valkiriya dağlarında,

tovuz quşlarının arasında

mən

az qala başım boyda

bir çiçək tapdım

və özümə tərəf çəkməklə

onu qoxladım…

 

O çiçək uğrunda qurban verdim

bir qulağımın sırğalığını,

burnumun pərəsiylə

bir gözümü.

Və on dənə siqaretimi…

 

…sabahısı gün

təkrar həmin yerə, geri döndüm ki,

o gözəl çiçəkdən

itkilərimin intiqamını alım

və onu tikə-tikə doğrayım!

 

Ancaq o,

gözümü-könlümü yenə də elə oxşadı ki,

tovuzquşunun başını üzməkdən başqa

əlimdən heç nə gəlmədi…

 

 

Abajur

 

Bu son beş ildə

gözlərimi yağır edib

eyni abajur.

Subay ömrümün

tozu yığılıb onun üstünə.

 

Bu mənzilə gətirdiyim məşuqələrin başı

eşqə-məşqə qarışdığından

abajurun tozunu almaq

ağıllarına da gəlməyib.

 

Ancaq onu da etiraf etməliyəm ki,

indiyədək

işim başımdan aşdığından

bu barədə ilk dəfə nə isə yazıram.

 

Həm də qalın toz qatı ucbatından

son beş ildə

bu masa lampasının saldığı işıq

yarı-yarıya öləziyibmiş.

 

 

Dahiyanə kəşf

 

Bu gün

qatarda

altıyaşlı dahi ilə rastlaşdım.

Düz qarşımda oturmuşdu o.

 

Qatar

okeanın sahili boyu

irəliləməyə başlayanda o,

məni süzüb dedi:

«Əcəb çirkinmiş…» 

 

Mən isə ilk dəfə

bunun

fərqinə vardım.

 

 

Fuzz

 

Fit çalaraq mənə tərəf qaçan

üç uşaq çığırır:

«sən həbs olunursan!»

«sən sərxoşsan!»

və əllərindəki

oyuncaq dəyənəklərlə

baldırlarımı döyəcləyirlər.

 

Onlardan birinin yaxasında

polis nişanı,

digərinin isə hətta qandalı olduğundan

əllərimi başımın üstünə qaldırıram çarəsiz…

 

mən şərab dükanına girəndə

onlar pətəkdən topayla uçan arılar kimi

yaxamdan əl çəkirlər…

 

içəri keçib,

özümə

yarım qallon ucuz viski

və üç dənə

nabat alıram.       

 

 

Qeyd: Qallon – 3,78 litrə bərabər maye ölçü vahidi

 

 

Borodinin taleyi

 

Gələn dəfə Borodinin bəstələrini dinləyəndə

unutma ki, o, adi aptekçi imiş və

sadəcə ürəyini boşaltmaq üçün musiqi bəstələyirmiş.

Həm də evi həmişə cürbəcür adamlarla:

tələbələr, rəssamlar, əyyaşlar və BLUMSlarla dolu olurmuş.

Çünki o, heç kimə və heç vaxt «Yox» deyə bilmirmiş.

 

Gələn dəfə Borodinin bəstələrini dinləyəndə

unutma ki, arvadı onun not vərəqlərini

pişiyinin yuvasına döşəyirmiş,

ya da turşumuş süd bankalarının ağzını

onlarla qapayırmış.

Xanımı astmadan və yuxusuzluqdan əziyyət çəkib

və əri üçün sadəcə qayğanaq bişirə bilirmiş.

Ətrafındakı hay-küydən qurtulmaq üçün

ev sahibi başını, qulaqlarını bürümək,

sarımaq istəyəndə

arvadı ona adi mələfə uzadırmış.

 

Bundan əlavə, Borodinin yatağında

həmişə yad birisi yatırmış.

Yatmağa imkan tapanda bu ər-arvad

onsuz da ayrı-ayrı yataqlarda uyuyurmuş.

Bütün stullara o-bu yiyələndiyindən

zavalı bəstəçi

adətən köhnə bir şala bürünüb,

pilləkəndə yatırmış.

Dırnaqlarını da arvadı qırxırmış və

evdə mahnı oxumağı, fit çalmağı, çay stəkanına

çoxlu limon salmağı yasaqlayıbmış qadın.

 

2 nömrəli simfoniya, si major

Knyaz İqor Orta Asiya çöllərində.

 

Gözlərini əl boyda qara parçayla örtməsə,

yuxulamazmış o.      

 

1887-ci ildə

Tibb Akademiyasında təşkil olunan rəqs gecəsinə

məzəli və milli kostyumda gedibmiş.

Huşsuz halda döşəməyə sərələndiyi vaxt

başına toplaşanlar

bunu da onun növbəti hoqqası sayırmışlar.

 

Gələn dəfə Borodinin bəstələrini dinləyəndə

unutma ki, o… 

 

Qeyd: BLUMS – (burada) yontanmamış tiplər

 

 

 

Dilimizə çevirdi – Azad YAŞAR

 

LENT

17 İyun 2018
16 İyun 2018
15 İyun 2018
14 İyun 2018
13 İyun 2018
12 İyun 2018