Kulis.az "44 günün yaddaşı" layihəsi çərçivəsində onun həyatı və döyüş yolu haqqında məqaləni təqdim edir.
Azərbaycan Xüsusi Təyinatlı Qüvvələrinin (XTQ) baş giziri, qrup komandiri, İkinci Qarabağ müharibəsi şəhidi və Vətən Müharibəsi Qəhrəmanı Camal Vidadi oğlu İsmayılov 1984-cü il iyulun 7-də Neftçala rayonunun Həsənabad qəsəbəsində anadan olub. Azərbaycanın hərb tarixinə adını "Hadrut fatehi" kimi yazdıran Camal İsmayılov qeyri-adi kəşfiyyat bacarıqları, poliqlotluğu və yüksək hərbi intellekti ilə seçilən peşəkar hərbçi olub.
Ailənin ikinci övladı olan Camalın uşaqlığının ilk illəri Rusiyada keçib. 1986-cı ildə ailəsi Rusiyanın Krasnoyarsk diyarının İqarka şəhərinə köçüb. Camal burada uşaq bağçasına gedərək qısa müddətdə rus dilini mükəmməl mənimsəyib. Anası Filarə xanımın dediyinə görə, bağçada 24 uşaq arasında yeganə azərbaycanlı olan Camal özünü o qədər məğrur aparırdı ki, tərbiyəçilər onu "Azərbaycanın fəxri" adlandırırdılar.
1991-ci ildə ailə yenidən doğma Neftçala rayonuna qayıdır və Camal təhsilini Neftçala şəhərindəki 1 nömrəli tam orta məktəbin rus bölməsində davam etdirir. Dəqiq elmlərə, fizika, riyaziyyat və kimyaya böyük maraq göstərən Camal həmçinin tarix və ədəbiyyatı dərindən mütaliə edirdi. Anası onun həkim olmasını istəsə də, hərbi xidmətə yollanmazdan əvvəl öz xatirə dəftərində "Mən nə vaxt böyüyüb öz taleyimi özüm həll etsəm, ən yaxşı zabit olacağam" sözlərini yazmışdı. Azərbaycan Tibb Universitetinə qəbul imkanı olmasına baxmayaraq, o, ali təhsildən imtina edərək 2001-ci ildə həqiqi hərbi xidmətə yollanır.
Müddətli həqiqi hərbi xidmətdə olarkən kəşfiyyatçı olmağı qarşısına məqsəd qoyan Camal Xüsusi Təyinatlı Qüvvələrin təkmilləşdirmə kurslarında iştirak edir. Kursu müvəffəqiyyətlə bitirdikdən sonra XTQ-nin kəşfiyyat və rabitəçi qrupuna seçilir. O, ömrünün 18 ilini bilavasitə xüsusi təyinatlı qüvvələrdə xidmətə həsr edib.
Camal İsmayılov hərbi biliklərini daim inkişaf etdirirdi. O, Azərbaycan, rus, ingilis və erməni dillərini sərbəst bilirdi. Xizək sürməyi, dağçılığı və paraşütdən tullanmağı peşəkar səviyyədə mənimsəmişdi. Eyni zamanda, dağçılıq üzrə xarici ədəbiyyatları tərcümə edərək hərbi dərsliklərin hazırlanmasında iştirak edirdi.
Camal həmçinin xaricdə keçirilən beynəlxalq hərbi təlimlərdə Azərbaycanı təmsil edirdi. 2019-cu ilin mayında Türkiyənin Kayseri şəhərində 5 dövlətin qatıldığı "ERCİYES - 2019" beynəlxalq hərbi təlimlərində iştirak edərək xüsusi diplomlarla təltif olunmuşdu. O, 2016-cı ilin Aprel döyüşlərində və 2020-ci ilin iyulunda Tovuz döyüşlərində ön cəbhədə xüsusi tapşırıqları icra etmişdi.
2020-ci il sentyabrın 27-də başlayan İkinci Qarabağ müharibəsində baş gizir Camal İsmayılov qrup komandiri kimi Füzuli, Cəbrayıl və Hadrut istiqamətlərində gedən ağır əməliyyatlarda iştirak edirdi. Müharibə zamanı onun ən böyük hərbi uğuru "Hadrut əməliyyatı" hesab olunur.
Düşmənin dilini mükəmməl bilməsi ona döyüş meydanında strateji üstünlük qazandırmışdı. Hadrut uğrunda gedən şiddətli döyüşlər zamanı Camal erməni hərbçilərinin rabitə dalğasına daxil olaraq onlarla erməni dilində əlaqə qurur. O, düşmənin rəhbər heyətinə və generallarına saxta əmrlər verərək onları çaşdırır. Nəticədə, heç bir güllə atılmadan 1500-dək erməni əsgəri səhv istiqamətə yönləndirilərək döyüş bölgəsindən uzaqlaşdırılır. Məhz bu misilsiz kəşfiyyat gedişinə görə silahdaşları onu "Hadrut fatehi" adlandırırdılar.
Oktyabrın ortalarından etibarən Azərbaycan Ordusu Qubadlı istiqamətində irəliləməyə başlayır. Camal İsmayılov və onun xüsusi təyinatlılardan ibarət qrupu düşmən arxasında strateji mövqeləri ələ keçirmək tapşırığı alır. Oktyabrın 19-da Qubadlı rayonu istiqamətində qeyri-bərabər döyüşə daxil olan Camalın qrupu düşmənə ağır zərbələr endirir. Təəssüf ki, oktyabrın 21-də Laçın dəhlizinə nəzarəti ələ almaq uğrunda gedən ağır döyüşlərdə baş gizir Camal İsmayılov və qrupunun bir neçə üzvü şəhidlik zirvəsinə ucalır.
Şəhadət xəbəri ailəsinə oktyabrın 21-də, anası Filarə xanımın doğum günündə təsdiqlənir. Camal İsmayılov doğulduğu Neftçala şəhərində böyük izdihamla dəfn edilib. Onun komandiri olduğu tabor müharibə ərzində XTQ-nin ən çox şəhid verən taboru kimi tarixə düşüb.
Camal İsmayılov 2008-ci ildə Fatimə xanımla ailə həyatı qurub. Döyüşə yollanarkən həyat yoldaşı hamilə idi. O, ailəsinə təsəlli verərək, "narahat olmayın, şəhid olsam, dövlətimiz balalarımın qayğısına qalacaq," – demişdi. O, hətta doğulacaq oğlunun adını da özü təyin etmişdi. Camalın şəhadətindən dörd ay sonra – 2021-ci il fevralın 12-də oğlu dünyaya gəldi və atası Camalın vəsiyyətinə uyğun olaraq uşağa "Alparslan" adı verildi. Ümumilikdə şəhidimizin iki qızı və bir oğlu var.
Azərbaycan Respublikasının ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı göstərdiyi hərbi rəşadətə görə Azərbaycan Prezidenti İlham Əliyevin 9 dekabr 2020-ci il tarixli Sərəncamı ilə Camal İsmayılova ölümündən sonra ən ali hərbi ad – "Vətən Müharibəsi Qəhrəmanı" adı verilib.
Onun xatirəsini əbədiləşdirmək məqsədilə 2021-ci ildə Neftçala şəhər Uşaq İncəsənət məktəbinə Vətən Müharibəsi Qəhrəmanı Camal İsmayılovun adı verilib. Həmçinin İctimai Televiziyada onun həyat və döyüş yoluna həsr olunmuş "Heç kim unudulmur, heç nə yaddan çıxmır — Camal İsmayılov" adlı sənədli film nümayiş etdirilib.
Ana səhifə
Reels
Yazarlar
Xəbərlər