Azərbaycan İncəsənət Məktəbinin təşəbbüsü, Elm və Təhsil Nazirliyi, Azərbaycan Teatr Xadimləri İttifaqının təşkilatçılığı ilə Şuşa Dövlət Musiqili Teatrında "2-ci Uşaq Teatrı Festivalı"nın açılışı olub.

Kulis.az xəbər verir ki, tədbir Milli Teatr Gününün 153-cü ildönümünə həsr olunub. Layihənin rəhbəri Fərid Bağırov, ideya müəllifi isə Tural Əliyevdir.

Festivalın açılış mərasimində çıxış edən münsiflər heyətinin üzvü Dağlar Yusif tədbir barədə məlumat verib. Qeyd edib ki, festival 6–14 yaş arası uşaqlar üçün nəzərdə tutulub. “Festivalda Azərbaycanla yanaşı, müxtəlif xalqların nağıllarının səhnə dili vasitəsilə təqdim olunması, bu nağılların müasir uşaqların düşüncə tərzinə uyğun şəkildə canlandırılması nəzərdə tutulur. Məqsəd uşaqların teatr sənətinə marağını artırmaq, onların estetik zövqünü formalaşdırmaq və yaradıcılıq potensialını üzə çıxarmaqdır. Bu il festivalın ən mühüm yeniliklərindən biri də inklüziv iştirak modelinin tətbiq olunmasıdır. Həssas kateqoriyaya aid uşaqlar da festivalda yer alıb, öz istedad və bacarıqlarını nümayiş etdirirlər”,-deyə D.Yusif əlavə edib.

Festival çərçivəsində iştirakçılar müxtəlif tamaşalarla çıxış edib, nağıl qəhrəmanlarını canlandırıblar.

Həmçinin Mədəniyyət Nazirliyinin nəzdində fəaliyyət göstərən Mədəniyyət üzrə Elmi-Metodiki və İxtisasartırma Mərkəzi (MEMİM) tərəfindən təşkil olunan ustad dərsi və təlimlər də keçirilib.

Təlimdə iştirakçılar kuklanın hazırlanma texnikası və dizaynı, kukla obrazının canlandırılması, səhnə üzərində kukla ilə düzgün hərəkət və koordinasiya, kukla teatrının estetikası və dramaturgiyası ilə tanış olublar.

• "Çəkməli it" filminin quruluşçu rəssamı vəfat etdi
• "Anam qorxunc bir varlıq idi..." - Məşhur psixoloq ailəsi haqqında nə yazırdı?
• Rus rəssamlığının "Böyük Karl"ı - O, niyə İtaliyaya mühacirət etmişdi?