Bakı Slavyan Universitetinin qonaqları – Osvald fon Volkenşteyn cəmiyyətinin prezidenti, Vürtsburq Universitetinin professorları Ziqlinda Hartman və Klaus Volf artıq iki həftədir ki, bu ali məktəbin Alman filologiya bölümündə tələbələrə mühazirələr oxuyurlar.

Sentyabrın son günü alman filologiyası tələbələri üçün yaddaqalan oldu. BSU-nun Mətbuat xidmətinin verdiyi məlumata görə, Professor Ziqlinda Hartmanın rəhbərliyi altında tərtib olunmuş “Alman ədəbiyyatından səhnəciklər”ədəbi-musiqili proqramı Universitet tələbələrini, onun nəzdindəki Məktəb-lisey kompleksinin şagirdlərini, hətta alman dili mütəxəssislərini əhatə edib. Gecədə alman dilində mahnılar, seirlər səsləndi, səhnəciklər göstərildi. BSU Məktəb-lisey kompleksinin akt zalında başlanan tədbir şəkildə Filologiya fakültəsinin “Tələbə klubu”nda davam etdirildi. Bu hissədə müəllim və tələbələrə alman mətbəxinin özəllikləri nümayiş etdirildi. Azərbaycan, rus, ingilis, fransız dilləri və ədəbiyyatları bölmələrinin tələbələri də almaniyalı müəllim və alman filologiyası bölümündə təhsil alan tələbələr tərəfindən alman mətbəxinə qonaq edildilər.

Gecəyə dəvət almış BSU rektoru, prof. A.A.Hacıyev, Avstriya səfirinin müavini və konsul Ute Friesner, Alman Akademik Mübadilə Xidməti (DAAD) Bakı ofisinin direktoru Ştefani Dufauks və digər qonaqlar bir neçə saatlığa özlərini alman mədəniyyəti və dil mühitinin iştirakçısı hiss etdilər. “Tələbə klubu”nda Alman-Azərbaycan çay süfrəsi arxasında ölkələrimiz və universitetlərimiz arasında əməkdaşlığın perspektivləri də müzakirə olundu.

Qonaqlar bu gecəni “Almaniyanın birləşdirilməsi günü”nə gözəl hədiyyə kimi dəyərləndirdilər.

• "Ulduzlu gecə", "Kartof yeyənlər" – Vinsent van Qoqun 5 əsəri
• Külləri dənizə səpilən Nobel mükafatçısı - Çinin ən çox qorxduğu yazıçı kim idi?
• Tom Kruz tanınmaz halda