Kulis.az “Miksteyp” rubrikasından "Can't help falling in love" mahnısı haqqında materialı təqdim edir.

Musiqi tarixinin romantik və təsirli balladalarından olan "Can't help falling in love" ("Aşiq olmaqdan özümü saxlaya bilmirəm"), "rok-n-rollun kralı" Elvis Preslinin 1961-ci ildə ifa etdiyi musiqi nümunəsidir.

İlk dəfə Preslinin baş rolda çəkildiyi "Blue Hawaii" filminin saundtreki kimi təqdim olunan bu bəstə, təkcə 1960-cı illərin hitinə çevrilməklə qalmadı, həm də onun canlı konsertlərinin dəyişməz, möhtəşəm final nodasına çevrildi.

Mahnının yaranma hekayəsi əslində XVIII əsr Avropa klassik musiqi ənənəsinə dayanır.

Əsərin melodiyası bəstəkarlar Hüqo Peretti, Luiji Kreatore və Corc Devid Vays tərəfindən yazılsa da, onun əsas musiqi özəyi fransız-alman bəstəkarı Jan-Pol-Egid Martini tərəfindən 1784-cü ildə qələmə alınmış "Plaisir d'amour" ("Məhəbbət həzzi") adlı klassik romansdan götürülmüşdü.

Bəstəkarlar bu klassik melodiyanı müasir pop-ballada strukturuna uyğunlaşdıraraq ona tamamilə yeni bir ruh verdilər.

Elvis Presli mahnını Hollivudda, "Radio Recorders" studiyasında lentə alarkən onun adət etdiyimiz kəskin, enerjili və ritmik rok-n-roll üslubundan kənara çıxdı.

Preslinin bu məxməri vokalı mahnıya elə bir səmimiyyət qatdı ki, mahnı dərhal qlobal fenomenə çevrildi.

Məhz bu səbəbdən Elvis 1960-cı illərin sonundan başlayaraq 1977-ci ildəki vəfatına qədər demək olar ki, bütün canlı konsertlərini məhz bu mahnı ilə yekunlaşdırır, səhnədən dinləyiciləri ilə vidalaşarkən bu əbədi sevgini onlara hədiyyə edirdi.

"Can't help falling in love" mətni insanın məntiqə, ağıla və qorxulara qalib gələn qarşısıalınmaz duyğularını — sevmək zərurətini saf poetik dillə şərh edir.

Mahnının ilk misraları müdrikliklə hisslər arasındakı o əbədi ziddiyyəti ortaya qoyur.

“Ağıllı adamlar deyər ki, yalnız axmaqlar tələsər... Lakin mən özümü saxlaya bilmirəm, sənə aşiq oluram. Qalmalıyammı? Bu bir günah olarmı? Əgər sənə aşiq olmaqdan özümü saxlaya bilmirəmsə?..”

Müəllif burada cəmiyyətin və ya ağlın verdiyi "tələsmə!" məsləhətlərini qəbul edərək, qəlbin əmrinin hər cür məntiqdən üstün olduğunu etiraf edir.

Presliyə görə, aşiq olmaq seçim deyil, qarşısıalınmaz təbiət qanunudur.

Mahnının növbəti hissəsində təbiət hadisəsi ilə insanın daxili aləmi arasında bənzətmə aparılır.

“Çayın dənizə doğru əminliklə axması kimi... Əzizim, bu, belədir, bəzi şeylərin baş verməsi alına yazılıb. Əlimdən tut, bütün həyatımı da al... Çünki sənə aşiq olmaqdan özümü saxlaya bilmirəm...”

“Əlimdən tut, bütün həyatımı da al” misrası isə bir insana verilə biləcək böyük etibarın və fədəkarlığın ifadəsidir.

"Can't help falling in love" mahnısını sadəcə 1960-cı illərin romantik saundtreki adlandırmaq, şəksiz, kifayətsiz qalardı.

O, klassik Avropa musiqi irsinin müasir pop mədəniyyəti ilə qovuşduğu, insanın sevgi qarşısındakı acizliyini və eyni zamanda bu acizliyin gətirdiyi möhtəşəm xoşbəxtliyi tərənnüm edən gözəl örnəkdir.

• "The Odyssey" rekordları qırmaqda davam edir
• Çanaq və qabırğası sınan Xalq artistinin son vəziyyəti
• Təbiətlə ilahi dünya arasında mistik körpü - Serafin Luinin "Həyat ağacı"