Ölümmü əzəldir, həyatmı?! - Yeni şeirlər

Ölümmü əzəldir, həyatmı?! - Yeni şeirlər
20 may 2023
# 14:30

Kulis.az Yusif Nazimin yeni şeirlərini təqdim edir.

Çox yadigar qalıb ondan

Hər şey onu xatırladır;
divardakı saatlar,
yükdəki döşəkçələr, yastıqlar...
Toxuduğu xalçalarda əllərinin izi qalıb.
Xalçalardan öpürəm,
əllərindən öpürmüş kimi!
Baxdığı hər şey - evdəki bütün əşyalar
bir zamanlar gözlərində əks olunub.
Əşyaları öpürəm,
gözlərindən öpürmüş kimi!
Sevdiyi hər şeyi sevirəm artıq,
özümü də!
Hər kəsdən çox sevərdi məni!
Sevdiklərimdən bircə
onun məni sevdiyinə əmin idim!
Çox yadigar qalıb ondan,
ən əzizi də xatirələr və dərddir!
Hər şey onu xatırladır –
Əkdiyi güllərdən Anamın ətri gəlir!

***

Sarı yarpaqların yaşıl tərəfi

Yarpaqların son mənzilidir
"payız mənzərəsi" dediyimiz gözəllik!
Burda intihar da var,
yeni doğuluş üçün başlanğıc da.
Birinin sonu birinin əvvəlidir.
Ölümmü əzəldir, həyatmı?!
Küləksiz də qopub düşər yarpaq,
Küləksiz də cəzb eyləyər torpaq.
Amma, küləklə bir başqa olur payız,
əzəmətli ağaclar da yellənir.
Heç də ölümə tez təslim olmur yarpaqlar,
uşaq kimi küçələrdə veyillənir.
Payız mənzərəsi də gözəldir!

***

Bir kədərin sevinciyəm

Bir kədərin sevinciyəm,
Bir sevincin kədəriyəm.
Bu sevdalar ölkəsinin,
Mən xaraba şəhəriyəm.

Bir üzümün cecəsi mən,
Halı pisin necəsi mən.
Gündüzlərin gecəsi mən,
Axşamların səhəriyəm.

Sevdaların adı mənəm,
Doğması mən, yadı mənəm.
Bu həyatın dadı mənəm,
Şəkəriyəm, zəhəriyəm.

Var dərdimdən ölən bəndə,
Dərdin mənlə bölən bəndə.
Sən ey mənə gülən bəndə,
Mən Allahın əsəriyəm.

***

Bir korun arzusu

Bir korun tək bir arzusu var;
Bircə, gözlərim görəydi,
Günəşə baxaydım, Aya baxaydım,
Bir neçə barmağım olmayaydı,
əllərimdəki saya baxaydım.
Şikəst əllərimlə dilənəydim.
"Allahım, lalların dilin aç" deyə,
dillənəydim.
Göylərə baxa-baxa,
"Ya Rəbbim, karlar kaş eşitsinlər
quşların səsin,
göy gurultusun,
yağış şırıltısın" - deyə,
dua edəydim.
Və bir də diləyəydim:
- Bu naşükür insanları
mənim halıma salma,
Onların gözün aç da,
Onların gözün alma.

***

Pəncərədən seyr

Əngin səma.
Ulduzlar toplaşıb Ayın başına.
Xatirələr gözümdə oba salır bir anlıq.
Sanki, uşaqlığım
Ayın arxasından baxır.

# 1918 dəfə oxunub

Oxşar xəbərlər

Ayaqyalın gəzsən, ayaqların döşəməylə öpüşəcək -  Alov İnannanın şeirləri

Ayaqyalın gəzsən, ayaqların döşəməylə öpüşəcək - Alov İnannanın şeirləri

17:00 31 mart 2025
Sizi unutmayacaq şanlı millətim əsla - Ən məşhur soyqırımı şeiri

Sizi unutmayacaq şanlı millətim əsla - Ən məşhur soyqırımı şeiri

11:05 31 mart 2025
Nə atan, nə anan, nə sevdiyin qadın... - Malik Atilayın yeni şeirləri

Nə atan, nə anan, nə sevdiyin qadın... - Malik Atilayın yeni şeirləri

14:20 28 mart 2025
Oyanmazmı, kor olası
baxtım, oy?! - Şair, mühacirət və sevgi

Oyanmazmı, kor olası baxtım, oy?! - Şair, mühacirət və sevgi

10:00 25 mart 2025
Saz bayramı, caz bayramı, qoz bayramı - Novruz şeirləri

Saz bayramı, caz bayramı, qoz bayramı - Novruz şeirləri

12:00 21 mart 2025
Bu bağçanın gülləri - İmarət Cəlilqızının şeiri

Bu bağçanın gülləri - İmarət Cəlilqızının şeiri

15:26 17 mart 2025
# # #