Kulis.az “Yeni imza” layihəsindən Şahid Cavadsoyun şeirlərini təqdim edir.
Və heç nə yerində deyildi
özünü eşitməzliyə vuran biriylə
Özünü eşidən kimi göstərən kar məsumluğu qədər
Və heç kim gözucu da baxmırdı stəkana
Suya ehtiyacı olmayana qədər
Bəs indi, ay insan, sənə sualım var
De görüm, səhraya qar yağmasına təəccüblənən varlı ərəblə
Yoxsul Afrika ölkəsində
su tapan uşağın təəccübü eynimi?
***
Səni sevmək
Bir quyunun dibində Yusif kimidir
Adam sonda hətta sultan da olar
Səni sevmək
Bir tərəfdən ölməkdi, bir tərəfdən yarımcan
Necə ki, müharibədə bir qolunu itirən əsgərin
qolu şəhid olur, özü isə yarımcan
***
Bir gün dünyadan "ölü yağışı" yağsa
Bircə ana, bircə bala da üzülərmi heç
evi damır deyə?!
O gün hamı qorxacaq; Birdən gün çıxar deyə...
Öz dünyasını sevə bilməyənlər
Üz tutur özgə dünyalara
Bir gün yarasalar sevəcəklər işıqlığı
Amma o zaman işıqlar kor olacaq yarasalara
***
Püskürərsə insan oğlu dərindən
Boğazında düyünlənməz qəhəri
Bədənindən, ruhundan və belindən
Qoparmalı tabu adlı “yəhəri”.
Adəm üçün din yox idi inansın
- Adəm oğlu, dində yoxdu bəhərin
Qadınların yükü yoxdur deyənlər;
Gör necədir dişi atın yəhəri
Kim tutacaq bu dünyanın yükünü?
Dinin canı mücərrəd Allahdadı
Ağrılıdır;
Bu dünyada hər şeyi
Qismət bilən, fatalistin imdadı.
***
Çağırsan heç çəkəmməz
Pikasso da rəsmini
Ruhən ölən insanın qanını heç çəkəmməz
Əgər cəhənnəmdisə dünyanın məhşər yeri
Qəlbən yanmış adamlar ora gedirlərmi bəs?
Allah, necə dadlıdı
Zindandakı çörəklər
Fəqət parça-parçadır
Azadlıqda ürəklər.
***
Bir azdan bir körpə gələr dünyaya
Və bu da son idi, son gözəl bir gün
Bir körpə gizliydi ana bətnində
Onu da "basdırdıq" dünyaya bu gün.
Bizi Telegram-da izləyin
t.me/kulis_az
Bizi Instagram-da izləyin
Bizi Facebook-da izləyin
Bizi Twitter-da izləyin
