Azərbaycan Respublikasının Prezidenti yanında Bilik Fondunun həyata keçirdiyi “İlboyu bilik” proqramı çərçivəsində keçirilən “Vətənin pərvəri ol!” yaradıcılıq müsabiqəsi yekunlaşıb. Kulisin Bilik Fondunun İnformasiya Təminatı sektoruna istinadən verdiyi məlumatına görə Azərbaycan Dövlət Rəssamlıq Akademiyasında qaliblərin mükafatlandırılması və rəsm, foto, əl işlərindən ibarət sərginin açılış mərasimi olub.

2014-cü ilin dekabrında elan olunan müsabiqəyə təqdim olunan işlər 4 nominasiyada (1-şeir, esse, hekayə; 2-rəsm; 3-foto; 4-əl işləri) və 3 yaş qrupunda (10-17 yaş; 18-25 yaş; 26-35 yaş) qruplaşdırılıb.

Bilik Fondunun icraçı direktoru Oktay Səmədov müsabiqə haqqında ətraflı məlumat verərək “Vətənin pərvəri ol” müsabiqəsində Azərbaycanın bütün rayonlarından 645 nəfər iştirak etdiyini bildirib: “Bunlardan 411-i qadın, 234-ü kişidir. Müsabiqə iştirakçılarından 544 nəfər 10-17 yaş, 49 nəfər 18-25 yaş, 52 nəfər 26-35 yaş qrupunda təmsil olunublar.

Münsiflərə 732 iş təqdim olunub. Bunlardan 292-si şeir, esse, hekayə nominasiyasında, 295-i rəsm, 73-ü əl işi, 72-si isə fotodur”.

Azərbaycan Dövlət Rəssamlıq Akademiyasının rektoru, xalq rəssamı, akademik Ömər Eldarov belə müsabiqələrin keçirilməsini yüksək qiymətləndirərək qalibləri təbrik edib, bütün iştirakçılara uğurlar arzulayıb.

Üç nominasiya üzrə müxtəlif yaş qruplarından 10 iştirakçı I yerə, 15 iştirakçı II yerə, 20 iştirakçı III yerə layiq görülüb, 10 nəfərə isə həvəsləndirici mükafat verilib.

Qaliblər qiymətli hədiyyələrlə və diplomlarla təltif olunublar.

Rəssamlıq Akademiyasının rəhbərliyi rəsm nominasiyasında 18-25 yaş qrupunda I yer tutan fiziki qüsurlu iştirakçı Behbud Cəfərquliyevə bir illik pulsuz hazırlıq kursları, III yer tutan iştirakçı – Ağdaş rayonunun Abad kənd sakini fiziki qüsurlu Qənirə Xəlilova üçün distant məşğələlər təşkil edəcək.

Azərbaycanın bütün bölgələrindən olan müsabiqə iştirakçılarının 300-ə qədər rəsm, foto və əl işləri nümayiş olunan sərgi üç gün davam edəcək.

• Kim Novak: "Məni canlandırmaq üçün tamamilə yanlış seçimdir"
• "Samirə Əşrəf və Günel Mövlud onlarla müqayisədə..." - Türkcə yazan müəllif görəsən, gənclərə nə öyrədir?
• Məleykə Əsədova: "Buna görə uzun illərdir ürək problemləri ilə mübarizə aparıram" - Müsahibə