Almaniyada nasist rejimi dövründə sahiblərindən alınmış sənət əsərlərinin geri qaytarılması istiqamətində daha bir mühüm qərar verilib.

Kulis.az xəbər verir ki, rəssam Maks Slevogtun 1900-cü ildə yaratdığı “Paradiesvögel” tablosu nasist təqiblərinə məruz qalmış kolleksiyaçı Eduard Fuksun varislərinə qaytarılıb.

Əsər uzun illər Almaniyanın Vuppertal şəhərində yerləşən Von der Heydt muzeyinin kolleksiyasında olub. Eduard Fuks isə yazıçı, incəsənət tədqiqatçısı və kolleksiyaçı kimi tanınıb. O, yəhudi həyat yoldaşı ilə birlikdə nasist rejimindən qaçmağa məcbur qalıb. Ailənin sənət kolleksiyası da həmin dövrdə müsadirə edilib, daha sonra isə Fuks 1937-ci ildə ölkəni tərk etməsi üçün tətbiq olunan ağır verginin ödənilməsi məqsədilə bir sıra əsərlərini satmağa məcbur olub.

“Paradiesvögel” tablosu da həmin satış zamanı dövriyyəyə daxil olub. Əsər sonradan müxtəlif şəxslərin mülkiyyətində qalıb və 2006-cı ildə Vuppertal muzeyi tərəfindən satın alınıb. Fuksun varisləri 2020-ci ildə tablonun mənsubiyyəti ilə bağlı araşdırmaya başlanmasını tələb ediblər. Araşdırmanın nəticəsində onun nasist təqibləri səbəbindən kolleksiyadan çıxarıldığı müəyyənləşdirilib. Vuppertal şəhər şurası restitusiya qərarını 2026-cı il iyulun 13-də təsdiqləyib.

Əsərin varislərə qaytarılmasından sonra onun hərraca çıxarılmasına qərar verilib. “Paradiesvögel” dekabrın 5-də Münhendə keçiriləcək satışda 40–60 min avro ilkin qiymətlə təqdim olunacaq. Ailənin çoxsaylı varisləri olduğundan satışın onların arasında bölüşdürülməsi üçün ən uyğun yol olduğu bildirilir.

Bu hadisə nasist rejimi dövründə müsadirə edilmiş sənət əsərlərinin mənsubiyyətinin araşdırılmasının onilliklər sonra da davam etdiyini göstərir. Muzey rəhbərliyi isə tarixi ədalətin bərpasını kolleksiyanın qorunmasından daha vacib prinsip kimi qiymətləndirib.

• AzTV 100 illik yubileyə həsr olunmuş çarx yayımladı
• Pulitzer mükafatçısının yeni romanı – Gələcəyin dağılmış Nyu-Yorkunda sağ qalmaq
• Marqot Robbinin köhnə serialı süni intellektlə yenidən hazırlanır