Şuşa Dövlət Musiqili Dram Teatrında Mixail Bulqakovun “Ağıldan kəm Jurden” əsəri əsasında hazırlanmış eyniadlı tamaşanın premyerası baş tutub.
Kulis.az xəbər verir ki, tamaşanın quruluşçu rejissoru Anar Babalı, rejissoru Lalə Şirinova, quruluşçu rəssamı Valeh Məmmədov, xoreoqrafı Amil Əhmədov, musiqi tərtibatçısı Asyaxanım Heydərova, işıq tərtibatçısı Kənan Məmmədovdur.
Obrazları aktyorlar Nazir Rüstəmov (Əməkdar artist), Xanirə İsgəndərova, Mətanət Eres, Dürdanə Dünyamalıyeva, Təranə Əliyeva, Emin Sevdiməliyev, Sürahi Əliməmmədova, Cavid Cavadzadə, Hamlet Qənbərov, Mobil Qurbanov, Rəhimə Məmmədova, Orxan Abışov və Azər Məmmədov ifa ediblər.
Teatrın repertuar və dramaturgiya üzrə mütəxəsisi Xaqani Əliyev tamaşa haqqında fikilərini "Kulis"lə bölüşüb:
“Ağıldan kəm Jurden” tamaşasının əsas konfliktini, Molyer teatrının aktyoru Jurdenin özünü zadəgan kimi göstərmək arzusu ilə sosial mahiyyəti arasındakı ziddiyyətlər təşkil edir.
Əsli-nəcabətindən utanan və olmadığı kimi görünməyə çalışan, düşüncəsi və tərbiyəsi imkan vermədiyi halda, ali təbəqəyə mənsub olduğunu sübut etməyə çalışan Jurdenin bu əlçatmaz istəyi ətrafında gülüş doğuran hadisələr baş verir. O titulların, yalançı şöhrətin arxasınca qaçaraq sağlam düşüncəsini itirir, mənsub olmaq istədiyi “elit” cəmiyyətin fırıldaqçıları tərəfindən aldadılır və axmaq insanın düşə biləcəyi vəziyyətlərə düşür.
Rejissor Anar Babalı M. Bulqakovun “pyes içində pyes” ideyasına sadiq qalaraq “tamaşa içində tamaşa” qurmaqla, Jurden obrazı vasitəsi ilə, mənsub olmadığı "yuxarı təbəqəyə” kor-koranə heyranlığı, saxta aristokratlığı, mənasız dəb düşkünlüyünü və insanın varlı və nüfuzlu görünmək naminə özünü aldatmasını, nəyin bahasına olursa olsun “elit” təbəqəyə “soxulmaq” istəyini önə çıxarır və qrotesk janrında tənqid edir. Rejissor tamaşaçını tamaşadan sonrakı düşüncələrində aşağıdakı nəticəni çıxarmağa kökləyə bilir: İnsanın əsl dəyəri onun var-dövlətində və ya titduğu vəzifədə deyil, ağlında, mənəviyyatında və mənsub olduğu dairədəki insanlara qarşı olan davranışındadır “ .
