Kulis.az "Hekayə müzakirəsi" layihəsindən Əli Zərbəlinin "Qəhqəhə" hekayəsi haqqında yazarların fikirlərini təqdim edir.
Mirmehdi Ağaoğlu: “Hekayə bir janr kimi kiçik mətn nümunəsi olduğu üçün ilk baxışda bizə elə gəlir ki, romana nəzərən zaman anlayışı elə də ciddi əhəmiyyət daşımır. Əslində isə bu cür kiçik hekayələr məhz cib saatı kimidir. İçinə bütün detallar nəqqaş gözü ilə, incəliklə yığılmalıdır ki, işləsin. Mən bu hekayədə zaman məsələsində axsama gördüm. Məsələn, ərinin ölümündən sonra Sənubərin bulağa getməsi hissəsi arasında zamanın keçməsi düzgün göstərilməyib.
Hadisə zamanı yayır, təhkiyəçi isə sıxır. Məsələn, cümlə belədir: “Çeşməyə su dalınca getdiyi günlərin birində”. "Günlərin biri" Abbasın ölümündən çox zaman keçməsini göstərir, halbuki ölünün heç yeddisi çıxmayıb. Çünki ölümündən bir həftə keçməmiş xəbər yayılır, hamı Salehin həyətinə yığışır. Bunlar incə nüanslardır. Onları tutuzdurmaq asan deyil, bəlkə, mənim hekayələrimdə də belə uyğunsuzluğu axtarsan taparsan. Sadəcə Zərbəlinin hekayəsini bəyəndiyim üçün bu qədər dərinə getdim. Bir də dialoqlar bir neçə yerdə süni gəldi. Qalan hər şey qaydasında. Müəllifə uğurlar”.
_1680682505.jpg)
Təvəkkül Boysunar: “Hekayə zəif təsir bağışladı. Mətnin oxucuda maraq doğurma gücü, zənnimcə, çox aşağı idi. Abbasın gülməkdən ölməyi adi bir hadisə kimi inandırıcı ola bilər, amma bu hadisənin sanki çox qeyri-adi bir şeymiş kimi böyük şöhrət qazanması, lətifəni öyrənməkdən yana adamların Salehin qapısına axışmağı, yaxud televiziya kanallarının kəndə gəlməyi - məncə, bunlar heç də inandırıcı alınmayıb. Qısası, təhkiyə mənə axıcı, maraqlı və inandırıcı gəlmədi”.
Kənan Hacı: “Qəhqəhə" hekayəsi alt qatı olan hekayədir. Amma müəllif sanki tələskənliyə yol verib. Zahirən sadə süjet xətti var, amma öz bətnində çox mətləbləri daşıyır. Situasiyanı bir qədər də dərinləşdirib bu sonsuz qəhqəhənin mahiyyətini üfüqi istiqamətdə genişləndirə bilərdi. İstedadla yazılmış mətndir”.
Nihat Pir: “Xırda ifadə xətalarını nəzərə almasaq, hər şey qaydasındadır. Mövzunun tapılması, təhkiyə bir yana, təkcə telefon danışığındakı dirilik nəyə desən, dəyər. Kənd camaatının şübhə içində gəlib qapının qarşısını kəsdirməsi isə, hekayədə ən çox bəyəndiyim detal oldu. Müəllifi təbrik edirəm, hekayə uğurludur”.
