Bu gün müasir Azərbaycan ədəbiyyatının tanınan simalarından olan şair-esseist Qulu Ağsəsin doğum günüdür. Onun 52 yaşı tamam olur. Kulis.az Qulu müəllimi ad günü münasibəti ilə təbrik edir və seçmə şeirlərini oxucuların diqqətinə çatdırır.
Dilimdən düşmür bir ad
nöqtələr
Tanrıdan gözəl cəllad
nöqtələr
Dərdidi dərmanımın
nöqtələr
Arasında qanımın
nöqtələr
Yel vurduqca tökülür
nöqtələr
"Göy" suala bükülü
nöqtələr
Qələm-varaqdı, bir də
nöqtələr
Göydə Allahdı, yerdə
nöqtələr
Doğum günümə
Anama: "Sevin"- dedilər,
"Bu oğlun, evin", - dedilər.
Mən doğulan gün dedilər
Aprelin 20-nə
Bu boş ömrümə tüpürdüm.
Doğulan günə tüpürdüm.
Tüpürdüm yenə tüpürdüm,
Aprelin 20-nə
İstədim öləm, qoymadı,
Lap nahaq yerə qoymadı.
Tanrım bir daşı qıymadı
Aprelin 20-nə.
Bilmirəm
Dan yeri - gecənin göydə od tutan
Bağrıdı.
Xəbərin varmı?
- Bilmirəm.
Bir də yarpaq salma külək poçtuna
Bağlıdı.
Xəbərin varmı?
- Bilmirəm.
Ürəyin - içəri qapındı sənin,
Aç görək, nəyin var qabında sənin?!
Ömür-gün bölünüb… qalıqda səni
Saxladı.
Xəbərin varmı?
- Bilmirəm.
Hərəmiz borcludu bir can ölümə,
Ölsək də, tapmarıq əncam ölümə.
Tanrı qırmaz bizi…ancaq ölümə
Yoxladır.
Xəbərin varmı?
- Bilmirəm.
Şuşa
Özün dağ başına qoyan şəhərin
ayağın xan kəndi yuyurdu
kürəyinin təri
cıdırda soyuyurdu.
Girməzdi
dumanına gün işığı,
havasına çay qaşığı.
Qayaları sərxoş idi,
adamları tay-tuş idi,
küçələri tay-keş idi.
Qəbirüstü yazıları
nəğmə kimi oxunurdu,
kolda-kosda tələf olan
qurd-quşu gül qoxuyurdu.
Kim idi qalxan o boyda dağı? -
yağışdan sallanıb enirdi qonağı.
... Dağın dizləri əsdi bir may səhəri
gözünün yaşı
ayağının suyuna qarışdı şəhərin...
Ağam!.. Adam!.. Ağdam!.
"Sən öl"ü, "sağ ol"u bəlli,
yaranandan üzü bəri
yasında Yasin oxunan,
toyunda tüfəng atılan -
şəhərim!
Dünyanı bazara çıxaran,
dünya bazarında satılan -
şəhərim!
Yuxarı başına keçən kafirə
yuxarıdan aşağı baxan,
Allahdan da çəkinməyən,
bircə əsarətdən qorxan!
Ağ alınlı qızılı atların vətəni,
seyid cəddinə içilən andların vətəni!
Sən dar gündə
Şuşaya arxa,
Xocalıya ümid oldun.
Son nəfəsəcən döyüşdün,
son nəfərəcən şəhid oldun...
Ağam şəhərim!
Adam şəhərim!
Ağdam şəhərim!
Şükür külünə,
şükür qayıdış gününə!
Sevincdən ağlımız çaşıb,
yüz min dəliynən gəlirik.
Bir "Uzundərə" havası çal,
çıx Bərdə yoluna -
Uzundərəynən gəlirik!..
