Azərbaycan Milli Elmlər Akademiyasının Nizami adına Ədəbiyyat İnstitutunun aparıcı elmi işçisi Siracəddin Hacının dahi Azərbaycan şairi Nizami Gəncəvinin “Sirlər xəzinəsi” məsnəvisi ilə bağlı yazdığı şərhin onuncu cildi çap olunub.
Kulis.azın verdiyi xəbərə görə, monoqrafiyaların yazılması üçün türk, fars, rus, ərəb, ingilis dillərində olmaqla beş mindən çox qaynaqdan istifadə edilib. Araşdırmada Nizami Gəncəvinin düşüncəsinin bağlı olduğu qaynaqlar, “Sirlər xəzinəsi” məsnəvisinin mövzuları, ideyaları, dəyərləri, bədii xüsusiyyətləri öyrənilmiş, beş min misra olan məsnəvi beyt-beyt şərh olunmuşdur.
Siracəddin Hacı bu fundamental araşdırmasında Nizami Gəncəvinin ədəbi, milli, dini, kəlami, fəlsəfi kimliyini elmi dəlillərlə ortaya qoymuş, “Sirlər xəzinəsi” məsnəvisinin anlam xəritəsini çıxarmışdır. Ümumi həcmi 6 min səhifədən çox olan tədqiqat işində müəllif qeyd edir ki, Nizami Gəncəvi insanlığa sevgi, barış, mərhəmət, ədalət gətirəcək dəyərlər yatırımı qoyub getmişdir. Onun bizim üzərimizdə haqqı var. Bu haqq Nizami irsini doğru öyrənmək və doğru öyrətməklə ödənilə bilər.
