Azərbaycanlı rejissorun “Biləsuvar” filmi Beynəlxalq festivalın qalibi olub.
Bu barədə Kulis.az-a məlumat verən filmin prodüseri İntiqam Hacılının sözlərinə görə, ssenarisi və quruluşu Elvin Adıgözələ aid olan “Biləsuvar” filmi bu il keçirilən "Moskovskaya premyera" festivalında "ən yaxşı rejissor işi" nominasiyasında qalib olub.
Festivalda rejissor Elvin Adıgözəl və prodüser İntiqam Hacılı iştirak ediblər.
Bundan əvvəl “Biləsuvar” filmi 2020-ci ildə Basan Beynəlxalq Filmlər Festivalında, Fransada Nant Beynalxalq Filmlər Festivalında, Almaniyanın GoEast Beynalxalq Filmlər Festivalında 2021-ci ildə Kazan Beynəlxalq festivalında iştirak edib. Rusiyanın Anapa şəhərində keçirilən “Kinoşok” festivalında “ən yaxşı ssenari” nominasiyasında qalib olub.
İntiqam Hacılı film haqda bunları söyləyib: “Biləsuvarda çəkilən film 5 hekayədən ibarətdir. Biləsuvarda yaşayan insanların həyatına işıq tutan filmdə - əsgərliyə gedən oğlan, köhnə məktəbdə işləyən müəllim, rayon mədəniyyət mərkəzində işləyən rejissor və aktyorlar, klip çəkdirmək istəyən müğənni və o klipi çəkmək istəyən rejissorun sonda balıqçının yanına getməsi mövzusu işlənib. Hər 5 hekayədə insanların çarəsizliyi və ümidsizliyi göstərilib, lakin necə deyərlər, həyatlarını bu tempdə davam etdirirlər, yaşayırlar və gələcəkdə hardasa bir işığın olduğuna inanırlar”.
Xatırladaq ki, Biləsuvar filmi 2020-ci ildə çəkilib. Azərbaycan-Fransa istehsalı olan tammetrajlı bədii film Karakteres ( Fransa), Memuar Films (Azərbaycan) və Adari Films (Azərbaycan) prodakşnlarının məhsuludur. Filmin prodüserləri İntiqam Hacılı, Etienne de Ricaud və İradə Bağirzadə, operatoru Oktay Namazovdur.
Əyalətdə baş verən hadisələrdən bəhs edən filmdə Kamran Ağabalayev, Günel Zülfüqarlı, İlqar Dadaş, Tofiq Aslanov, Laçın Aslanova, Niyaməddin Amanov, Günel Mirzəli, Cahangir Məlik, Məmməd Hacıyev, Ruslan İsmayılov, Teymur Quliyev və başqaları çəkiliblər.
