Kulis.az Bahar Zamanının yeni şeirlərini təqdim edir.
Mən yazdığım şeirlərin çoxu həsrət, çoxu qəm
Bu nisgilin ağırlığı ölənəcən bəsimdi
İndi səndən uzaqları şeirlər də ovutmur
Burda yağış çoban aldadan, külək də bir əsimdi.
Aramızda uzun yollar, yolları da dağ kəsib
Necə gəlim əllərinin yaxasından yapışım?!
Bəlkə sən də uzaqlarda dərd cəkib, qəm yemisən
Bəlkə sən də... iraq olsun, qulaqlara qurğuşun.
Mən bir az da öyrəşmişəm həsrətə, intizara
Amma sənin yoxluğunun ağrısı bir başqadı
Dəmin gəlib siqareti siqaretə calayır
Ən uzağı sərxoşluqdu... içkilər də baş qatır.
Yenə düşmür dodağımdan adın dilimə hopub
Ara sıra caşıram da hamıya "Sən" deyirəm
Bir az keçir, həyat qatır başımı yaşayıram
Bir az keçir, dəmin gəlir... özün gəlsən, deyirəm.
Özün gəlsən unuduram o beş illik dərdimi
Qopararam ağrıları saçlarımın ucundan
And içərəm yaşamağa çəkərəm son pərdəni
Can vermərəm "xərçənglərə" öldürərəm acından.
***
Dur ayağa vətən gəlir!
Qalx ayağa, şəhid gəlir
Baş əy başı sağ olanım
Torpağından yaralanan
Qan ilə sağalanım.
Aç qoynunu, bas bağrına
Bayrağa bükülüb gəlir
Anasının göz bəbəyi
Gözündən tökülüb gəlir.
Oxşa, ovut yarasını
Yatma səhərəcən, vətən
Xeyrə qalmaz istəsən də
Uzanar bu gecən, vətən.
"Başın sağ olsun" dedimi
Başında qəlpə qalanım?!
Yarasına torpaq dolan
Şəhid, başına dolanım.
Gedin deyin anasına
Balası vətəndi daha
Boyu o boyda olmadı
Torpağıyla təndi daha.
Dur ayağa, vətən gəlir
Cök dizin üstə, qarşıla!
Aç qoynunu qara torpaq
Aç gözün üstə qarşıla!
Quruca torpaq idi adın
Qanı səni vətən etdi
Bir igidin son nəfəsi,
Canı... səni vətən etdi.
Vətən üçün döyüşəndə
Dayanan ürəkdi - Vətən!
Dur ayağa, Şəhid gəlir
Qəzan mübarəkdi, Vətən!
***
Məndən aldığını nə etdin axı?
Kimin həsrətinə su çiləyirsən?
Dəyirman qurmusan "dünya" adında
Bir-bir üyüdürsən və ələyirsən.
Haradan keçir ki ahım göylərə?
Nə vaxt eşidirsən dualarımı?
Hansı kitablarda səni axtarım?
Hansı cavablayar suallarımı?
Səni inkar edib yüz yol içimdə,
Səni axtarmışam əlimin altda.
Sükutum batırıb qulaqlarımı
Dualar etmişəm dilimin altda.
Sən yoxun, sən heçin mücəssiməsi
Məndən yansıyırsan... güman yerinəm
Sən mənim bildiyim ən gözəl nağıl
Mən sənin... mən sənin şah əsərinəm.
Bəxtimə yazdığın anama yazıq
Atam itkin düşüb, ölüsü yoxdu.
Bu qədər insanın var yer üzündə
Məndən zırraması, dəlisi yoxdu.
Qoy gəlim bir də say günahlarımı
Hansını yumağa ehtimalım var ?
Hansı imtahanın nəticəsiyəm
Cənnətə düşməyə neçə xalım var?
***
Tutulsa, gözlərim
yoluna baxmaqdan
Mən də bir şəkli var
Qoyacam gözümün üstünə
Öpəcəm... keçəcək
Desə ki, gəlirəm
Dağ aşıb, sel daşıb
Yolacam saçımı
Yoluna, izinə səpəcəm... keçəcək
Bu həsrət, bu uzaq
İncitsə ruhunu
Oxşayıb saçını
Nəğmə oxuyacam sübhəcən.. keçəcək
Bundan sonra gələn
Ayları verərdim
İlləri verərdim
Bilsəm ki onunla
Bir gecəm...bir gecəm, keçəcək
Bu da bir sınaqdı
Gəl keçək birlikdə
Sonra bas bağrına
De ki "bax, darıxma
Sərçəcəm, keçəcək!
Daha nə qaldı ki
Döz bir az...
Təkcəcəm, keçəcək!
