Almaniyanın ən çox sevilən müasir yazıçılarından biri olan Daniel Keelmanın “Dünyanın arşını” romanı Azərbaycan dilində çap olunub.
Kulis.azın verdiyi xəbərə görə, “Teass-Press” nəşriyyatında işıq üzü görən kitabı dilimizə tanınmış tərcüməçi Vilayət Hacıyev çevirib.
Qeyri-adi, fantaziya ilə dolu, təsirli bir roman olan “Dünyanın arşını”nda Keelman iki dahinin, alman maarifçiliyinin iki böyük nümayəndəsinin – riyaziyyatçı Karl Fridrix Qauss və təbiətşünas Aleksandr fon Humboldtun həyatını, arzu-istəklərini, zəif cəhətlərini, onların gah sadəlövhlüyün, gah da dahiliyin zirvəsinə ucalmasını, uğursuzluqlarını və uğurlarını təsvir edir.
İlk baxışda macəra təsiri bağışlayan “Dünyanın arşını” romanı dərin fəlsəfi mahiyyət kəsb edir və Aleksandr fon Humboldtla Karl Fridrix Qaussun şəxsində yalnız alman ziyalısının tipik milli xüsusiyyətlərini canlandırmır, eyni zamanda insanları düşündürən bir sıra mətləbləri gah yumorla, gah da ciddi təhkiyə tərzi ilə ön plana çəkir.
Romanı Libraf kitab mağazasından əldə edə bilərsiniz.
