“Belə bir deyim var: qazanc quduranda mayanı yeyir. Bunlar mayanı yeyən uşaqlardır. Məsuliyyətsizlik, özbaşınalıq, əxlaqsızlıq bunları o əndazəyə çatdırıb ki, maya cəhənnəm, oturduqları kresloları, təmsil etdikləri televiziyaları gözdən salırlar”.

Kulis.az xəbər verir ki, bunu Lent.az-a açıqlamasında Xalq artisti Şeyx Əbdül Mahmudov deyib.

O bildirib ki, bayağı qonaqları verilişlər ədoldururlar:

“Televiziya rəhbərləri hara baxırlar? Onlar kimlərdir? Bu xalqın sənətinə, mədəniyyətinə, dəyərlərinə nə dərəcədə maraqlıdırlar? Ağıllarına nə gəlir, onu edirlər. Milyonlardan, bahalı maşınlardan, villalardan danışırlar. Haradandır bunlar? 62 ildir kinoya, mədəniyyətə xidmət edirəm, 3-4 il də televiziyada işləmişəm, quru maaşdan başqa qazancım olmayıb. Artıq aparıcıları qınamıram. Onlar biznes qurublar orada. Yaxşı, bəs televiziya rəhbərlərinin marağı nədir? Bəs dövlət siyasəti, onun təbliğatı, milli dəyərlərimiz onların marağında deyil? Televiziya qazanc mərkəzi deyil axı. O aparıcıların hamısı bahalı maşınlarda gəzir. Bunlar məgər bizdən deyillər? O verilişlərdə əndamlarını nümayiş etdirən, ritmi, avazı olmayan müğənnilər televiziya rəhbərləri tərəfindən görülmür?”

Xalq artisti qeyd edib ki, xəstəliyin səbəbini müalicə etmək lazımdır:

“Rəhmətlik Arif Babayev pul verib çıxırdı televiziyaya? Dünyanın hər yerində müğənnilər televiziyadan pul qazanırlar. Müğənniyə pul verməkdənsə, müğənni bunlara pul verir. Çünki peşəkar müğənni, sənətkar yoxdur. Hamısı özləri kimi “xalturşik”, bayağı, əttökəndir. Bədəni, sinəsi hesabına “sənətkar” olanlardır. Aralarında bəziləri var, onları nəzərdə tutmuram. 4-5 nəfər var ki, normal əqidəli insanlardılar. Kütləvi şəkildə bu cür biabırçılıq olmaz. O aparıcıların intellektual səviyyəsi nədir? Onları çağırıb Azərbaycan dilinin qrammatikasından sual verin, bilməyəcəklər. Verilişlər elə bil vağzaldır, istəyən gəlir, istəyən gedir. Manıslar gedib toylardan 5-10 manat yığıb gətirib verirlər bunlara, onlar da mənəviyyatımızı korlayırlar. Hamısı zəncirvari cinayətkarlardır. Belə biabırçılıq olmaz”.

• "Evdən qaça bilərsən, qismətdən əsla!.." - Didəm Madak niyə unudulmaq istəyirdi?
• Azərbaycan kinosunun yığcam ensiklopediyası hazırlandı
• Homoseksual tiktokerin qarşısında növbəyə düzülən kişilər...